2 мамыр күні сотта Қарағанды облысы бойынша сот сараптамасы институтының сарапшысы Жанна Ахметова сөз сөйледі. Ол зардап шеккен жедел жәрдем жүргізушісі Төреғали Берікқалиұлының денсаулығына келтірілген зиянның ауырлығын анықтау үшін бұрын тағайындалған қосымша сараптаманың қорытындысын жариялады. Сарапшының айтуынша, мамандар негізгі сұраққа жауап бере алмады. Себебі ол невропатолог кеңесін қажет етеді.

"Қосымша сот-медициналық сараптама жүргізу үшін бізге Төреғали Берікқалиұлының барлық медициналық құжаты, оның ішінде емханадан алынған амбулаторлық картасы ұсынылды. Бұл құжаттарды зерделеу кезінде Берікқалиұлының 21 күннен астам амбулаторлық емделуден өткені анықталды. Бірақ біз Берікқалиұлының денсаулығына келтірілген зиянның ауырлығын анықтай алмадық. Өйткені мамандардың алдында тұрған мәселелерді шешу үшін невропатологтың кеңесі қажет болды", – деді сарапшы сотта.

Жәбірленушінің адвокаты Бағдат Хасенов сотқа невропатолог шақыруды сұрады.

"Оның медициналық тарихында 2017 жылдың 9 маусымында оған титан тақтайшасы бар бас сүйек ақауы пластикасы жасалғаны және осы жылдың 20 қыркүйегінде "тұрақты когнитивті бұзылулары және есте сақтау қабілетінің нашарлауы бар психоорганикалық синдром" диагнозы қойылғаны көрсетілген. Осыған байланысты сарапшыларға сұрақтар қою үшін осы сот отырысына невропатолог дәрігердің қатысуы туралы өтініш білдіремін. Жәбірленушінің есте сақтау қабілеті көз алдымызда нашарлап барады. Ол тіпті қылмыстың егжей-тегжейін есіне түсіре алмайды. Айыпталушының не айтқаны және қылмыстың қалай болғаны оның есінде жоқ", – деді жәбірленушінің адвокаты Бағдат Хасенов.

Сондай-ақ жәбірленушінің өкілі өз клиентіне келтірілген зиянның ауырлығын анықтайтын тағы бір сот-медициналық сараптама тағайындау туралы өтініш білдірді.

"Берікқалиұлының денсаулығына айтарлықтай зақым келген. Ол 27 қаңтардан 1 наурызға дейін ауруханада болды, ал екінші мұрын операциясы 18 наурызда жасалды. Тиісінше, анықтығы жеткіліксіз болған жағдайда қосымша сараптама тағайындауды сұраймыз. Бүгін бізде сарапшы бұрын мәлімделген өтініште қойылған сұрақтарды түсіндіріп, жауап беру үшін невропатологтың кеңесі қажет екенін айтты. Осыған байланысты қосымша сараптама қажет", – деді Бағдад Хасенов.

Судья Бахтияр Ақанов бірінші өтінішті қанағаттандырусыз қалдырып, қосымша сараптама тағайындау туралы өтінішті қанағаттандыру немесе қабылдамау туралы шешім қабылдау үшін кеңесу бөлмесіне кетті.

Айта кетейік, 2 мамырда Қарағандыда жедел жәрдем көлігінің жүргізушісіне күш көрсету ісіне қатысты сот процесі тікелей эфирде көрсетілетіні белгілі болды. Бұл туралы Жоғарғы сотқа хабарлады.

Биыл қаңтар айында сотталушы Нұрболат Дәкебаев жедел жәрдем жүргізушісіне бірнеше рет соққы жасаған еді. Бұл оқиға видеоға түсіп қалып, көпшіліктің наразылығын тудырды. Осыдан кейін полиция қызметкерлері Дәкебаевты бес күн бойы іздеп, ақпан айында Қарқаралы ауданындағы қыстақтардың бірінен тапты.

Еске салсақ, бұған дейін Қарағандыда ер адамның жедел жәрдем жүргізушісін соққыға жыққаны туралы жазған едік. Кейіннен күдікті ұсталып, екі айға қамауға алынған еді.

Талқылау