Huawei Қазақстанның 48 университетінде ICT Competition 2026-2027 Roadshow өткізеді

Roadshow аясында Huawei өкілдерінен құралған команда АКТ бағытында білім алып жатқан студенттермен және оқытушылармен кездеседі. Қатысушылар Huawei ICT Competition 2026-2027 байқауының шарттары, іріктеу кезеңдері және халықаралық технологиялық сайысқа дайындалу мүмкіндіктері туралы толық ақпарат ала алады.

Huawei ICT Competition жыл сайын университет студенттері мен оқытушылары арасында өткізіледі. Байқау қатысушыларға ақпараттық-коммуникациялық технологиялар саласындағы білімін тереңдетуге, практикалық дағдыларын дамытуға және оларды нақты міндеттерді шешуде қолдануға мүмкіндік береді. Сондай-ақ қатысушылар басқа елдердің студенттері және сарапшыларымен тәжірибе алмаса алады.

“Huawei ICT Competition студенттерге университет қабырғасында алған теориялық біліммен шектелмей, оны іс жүзінде сынауға мүмкіндік береді. Биыл Roadshow Қазақстанның 48 жоғары оқу орнын қамтиды. Осылайша біз байқау мүмкіндіктері туралы барынша көп студентке ақпарат беріп, олардың өз күшін сынап көруіне жағдай жасағымыз келеді. Қазақстандағы жас АКТ мамандарының әлеуеті жоғары екенін көріп отырмыз және олардың кәсіби дамуы мен халықаралық тәжірибе алмасуына көбірек мүмкіндік жасауды көздейміз”, – деді Huawei Technologies Kazakhstan бас директоры Сун Ясюй.

Қазақстан үшін жаңа маусым Huawei ICT Competition 2025-2026 байқауындағы жоғары нәтижелерден кейін басталып отыр. Шэньчжэньде өткен жаһандық финалда қазақстандық студенттер Network Track бағыты бойынша екінші, ал AI Innovation бағыты бойынша үшінші орын иеленді. Өткен маусым байқау тарихындағы ең ауқымды кезең болды: оған 100-ден астам ел мен өңірдегі 2 000-нан астам жоғары оқу орнынан 220 мыңнан астам студент пен оқытушы қатысты.

Roadshow Huawei ICT Competition 2026-2027 байқауына бастайтын алғашқы кезең болмақ. Университеттердегі кездесулер сериясынан кейін қатысушыларды 30-31 қазанда ұлттық алдын ала іріктеу кезеңі, ал 27 қарашада ұлттық финал күтеді. Өңірлік финал 2027 жылғы наурызға, ал жаһандық финал 2027 жылғы мамырға жоспарланған.

Huawei ICT Competition және АКТ академиялары арқылы Huawei университеттермен ынтымақтастықты дамытып, студенттердің заманауи технологиялық білімге қол жеткізу мүмкіндіктерін кеңейтуді жалғастыруда. Бастаманың негізгі бағыты – практикалық даярлық, халықаралық тәжірибе алмасу және АКТ мамандарының жаңа буынын қалыптастыру.