Баланың әкесі Абылайдың айтуынша, ұлы мен қызының бұл балабақшаға бар болғаны бір апта, 6 ақпаннан бастап барған. Балалар күн сайын таңғы 9:00-ден 11:30-ға дейін, яғни екі жарым сағат қана болған. Алайда, бірнеше күннен кейін ата-анасы ұлының мінез-құлқындағы алаңдататын өзгерістерді байқай бастаған.

"13 ақпанда ұлымды алып кетіп жатқанымда, ол өзін тұншықтырғанын айтты. Алғашында мен мұны балалардың ойыны деп ойладым. Бірақ үйге келген соң ұлым қатты мазасызданып, анасына болған жағдайды егжей-тегжейлі айтып берді. Біз бірден балабақшаға барып, бейнебақылау жазбаларын көрдік. Көргенімізден есеңгіреп қалдық: менің ұлымды 10 минут бойы тұншықтырған, ал жанында тұрған екі тәрбиеші ештеңе болмағандай шай ішіп отырған", – деді Абылай.

Ер адамның айтуынша, ол жұбайымен бірге тек екі күннің бейнебақылау жазбаларын ғана қарап үлгерген.

"Бұған дейін, 12 ақпанда, бейнежазбадан балабақша менеджерінің баламды топтан жеке бөлмеге алып кеткені анық көрінеді. Сол жерде ол бір сағат бойы ұлыма зорлық көрсетіп, жылап жатқанын елемей, аяқпен жерге басып тұрған", – дейді әкесі.

Абылай тергеу барысында олар бейнежазбаларды басқа күндер бойынша да қарап, кішкентай қызының тобында не болғанын тексеретінін атап өтті.

"Қазір біз балаларды балабақшадан алып, дереу дәрігердің тексеруінен өткіздік. Ұлымның денесінде көгерулер, соққылар және өкпесінде қараңғыланған жерлер анықталды. Бізге тергеуді әрі қарай жалғастыру үшін сараптама жасау қажет", — дейді Абылай.

Баланың әкесі бұл балабақша ұзақ уақыт бойы іздеп, таңдағанын айтты.

"Біз жекеменшік балабақша болғанын қаладық. Бізді халал, дұрыс тамақтану мәзірі бар, тәрбиешілері намаз оқитын балабақша болғаны қызықтырды. Мұнда балаларға жақсы қарайды деп ойладық. Бірақ енді жасаған таңдауымызға өкінеміз. Кеше стресстен қан қысымым көтеріліп, жедел жәрдем алып кетті", — дейді ол.

Әкесі ұлына шабуыл жасаған тәрбиешіні, бірнеше рет көргенін айтып, басқа күндері оның сабырлы адам болып көрінгенін атап өтті.

"Біз жазбаларды бірге қарап отырғанымызда, ол сабырлы түрде отыра берді, өкініш белгілері болмады. Маған оның психикалық ақаулары бар сияқты көрінді. Біз бес сағат бойы бейнежазбаларды қарап шықтық, ал ол сол уақыт бойы сабырлы түрде қасымызда отырды, тек соңында ғана кешірім сұрады", — деді әкесі.

Ер адамның айтуынша, қазір ұлына психологтың көмегі қажет және отбасы мамандарға жүгінуді жоспарлап отыр.

"Енді мен балаларымды басқа балабақшаға беруге қорқамын, бірақ біз заң аясында әділдікке қол жеткізу үшін барымызды саламыз. Мен тәрбиешілерден, менеджерлерден бастап, балабақша басшылығына дейін бәрі жазаланғанын қаламын", — деп қорытындылады ол.

Еске салсақ, бұған дейін Алматыда балабақшада тәрбиеші баланы ұрып-соғып, тұншықтырғаны туралы жазған едік.

Талқылау