Депутатпен сөзге келіп қалған экс вице-министр жаңа қызметке тағайындалды
Бұрынғы ауыл шаруашылығы вице-министрі Әбілхайыр Тамабек Жамбыл облысының әкімдігіне қызметке тұрды. Бұл туралы Stan.kz ақпарат агенттігі хабарлайды.
Фото: Жамбыл облысының әкімдігі
"Президент әкімшілігінің келісімімен Жамбыл облысы әкімінің бұйрығымен Әбіхайыр Ғалымұлы Тамабек Жамбыл облысының әкімі қызметіне тағайындалды”, – делінген әкімдік мәлімдемесінде.
Әбілхайыр Ғалымұлы 1994 жылы Жамбыл облысы Талас ауданында туған.
2015 жылы Халықаралық Бизнес Университетін "бағалау", Польша Республикасы Луис ұлттық университеті Жоғары бизнес мектебін "менеджмент", 2019 жылы Қазақстан Республикасы Президентінің жанындағы Мемлекеттік басқару академиясын "мемлекеттік және жергілікті басқару" мамандықтары бойынша тәмамдаған.
Әбілхайыр Тамабек еңбек жолын 2011 жылы жеке секторда бастады.
2015 - 2017 жылдары Қазақстан Республикасының Ұлттық экономика министрлігі Статистика комитетінің қызмет көрсету және энергетика статистикасы басқармасының сарапшысы, 2017-2018 жылдары Қазақстан Республикасының Қорғаныс және аэроғарыш өнеркәсібі министрлігі Мемлекеттік материалдық резервтер комитетінің персоналды басқару және құжатайналым қызметінің сарапшысы, 2018-2019 жылдары Қазақстан Республикасының Қорғаныс және аэроғарыш өнеркәсібі министрлігі Мемлекеттік материалдық резервтер комитетінің персоналды басқару және құжатайналым қызметінің басшысы, 2019-2020 жылдары Қазақстан Республикасының Цифрлық даму, инновациялар және аэроғарыш өнеркәсібі министрлігі адами ресурстарды басқару департаментінің кадр жұмысы басқармасының бас сарапшысы, 2020-2022 жылдары Жамбыл облысы әкімдігінің жерлерді пайдалану және қорғалуын бақылау басқармасының басшысы – бас мемлекеттік инспекторы, 2022 жылы Қазақстан Республикасының Ауыл шаруашылығы министрлігі Жер ресурстарын басқару комитеті Жамбыл облысының жер ресурстарын басқару департаментінің басшысы – жерді пайдалану мен қорғау жөніндегі бас мемлекеттік инспекторы қызметтерін атқарған.
2022 жылғы сәуірден бастап Қазақстан Республикасының Ауыл шаруашылығы вице-министрі лауазымында қызмет етіп келді.
Кеше ғана үкімет қаулысымен Әбілхайыр Тамабек ауыл шаруашылығы вице-министрі қызметінен босатылғанын жазған едік.
Еске сала кетейік, өткен жылдың қыркүйегінде мәжілістің аграрлық мәселелер комитетінің кеңейтілген отырысында вице-министр Әбілхайыр Тамабек пен мәжіліс депутаты, "Республика" партиясының жетекшісі Айдарбек Қожаназаров арасында кикілжің болды.