"Дәрігерлер алдады": Алматыда үшінші нәрестесін босанған әйел көз жұмды
Перзентханаға босануға барған келіншек көп ұзамай көз жұмды. Үшінші перзентін дүниеге әкелген әйел қансырап қалған. Алайда кенжесі анасының аялы алақынан да сезініп үлгермеген. Енді үш баласы жетім қалды. Туыстары дәрігерлерді кінәлауда. Бұл туралы Stan.kz ақпарат агенттігі "Еуразия бірінші" арнасына сілтеме жасап хабарлайды.
Алматылық Анна Есінбекова бір апта бұрын ғана №5 қалалық перзетханаға жатқызылған. Алайда босанғаннан кейін көз жұмды дегенге туыстары сене алар емес. Айтуларынша жүктілігі қалыпты өткен, кері көрсеткіштер болмапты. Ай-күні жеткен келіншек осыған дейін екі перзентін өзі босанған.
"Бірақ оның денсаулығында ешқандай ақау болған жоқ. Үнемі хабарласып, сөйлесіп тұрдым. Бәрі қалыпты, талдаулары жақсы, тек баласы үлкен деді", - дейді марқұмның енесі Зәуреш Райханова.
Дәрігерлер келіншектің іштегі баласы үлкен болғанына қарамастан 28 ақпан күні таң ата босандырған. Алайда "жағдайы бірден нашарлап кеткенін ақ халаттылар жасырды" дейді туыстары. Тек түске таман дәрігерлер келіншектің жағдайы ауыр екенін, жасанды тыныс алу аппаратына қосылғанын, көп қан кеткенін айтыпты. Жақындары егер кесір тілігімен босандырғанда Анна аман қалар еді деп отыр.
"Күйеу балам "мені алдады" деп айтты. Анна босанды деп айтқанымен, шын мәнінде жансақтау бөліміне жатқызып, ота жасап, қан құйған. Таңғы төрт жарымда босанғанымен, түске дейін ол туралы айтпаған", - деді марқұмның анасы Татьяна Дю.
- Семейде 51 жастағы әйел тұңғышын өмірге әкелді
- "Жаңа туған сәбиін қолына ұстай алмай кетті": Әйелінен айырылған әке бес баласын өзі тәрбиелеп отыр
- "Қыз туа бересің деп анамды көп жазғырды": Ұлданай, Ұлтуар есім иелері аттарының өмірлеріне әсері мен өз оқиғаларымен бөлісті
Дәрігерлер келіншектің қаза болғаны туралы туыстарына жексенбі кешкісін ғана айтыпты. Анна жүктіліктің 41 аптасында болған екен. Кесір тілігін жасауға негіз болмаған соң өзін босандырыпты. Бірақ бірден қан кетіп, өмірін сақтап қалу үшін қаладағы білікті мамандардың барлығы жұмылдырылған. Сондықтан туыстарына кеш хабар берілгенін айтады. 15 жылдың ішінде осындай жағдай бірінші рет тіркеліп отырған көрінеді.
"Дәрігерлердің жұмылып кірісіп, жүргізген іс-әрекеттері оңтайлы нәтиже бермеді. Әйелді аман сақтап қалу мүмкін болмады. Қазір комиссия құрылған. Комиссия жұмыс істеп жатыр. Нәтижесін комиссия айтады", - деді №5 перзентхана бас дәрігерінің орынбасары Науат Тілешова.
Марқұмның туыстары дәрігерлерді кінәлауда. Сондықтан құзырлы органдарға шағым түсірген.
Полицияның мәліметі бойынша, қылмыстық кодекстің "Медицина немесе фармацевтика жұмыскерiнiң кәсiптік мiндеттерiн тиiсiнше орындамауы" бабы бойынша сотқа дейінгі тергеу амалдары басталған. Егер дәрігердің кінәсі делелденсе, 5 жылға дейін бас бостандығынан айырылуы мүмкін.
Ал марқұмның артында үш перзенті мен күйеуі қалды.
