"Бұл – арамыздағы құпия": Ақтауда жаттықтырушының бес жасар қызды зорлап келгені мәлім болды
Ақтауда жаттықтырушы 5 жасар қызға азғындық жасап келгені мәлім болды. Бұл туралы "НеМолчи.Kz" қоры жазды, деп хабарлайды Stan.kz ақпарат агенттігі.
Қор өкілдерінің айтуынша, сенім телефонына хабарласқан бойжеткен 5 жасар жиенін жаттығу кезінде жаттықтырушы бірнеше рет зорлағанын айтқан.
Белгілі болғандай, анасы қызының жағдайынан күдіктеніп анықтап сұрағанда, бала каратэден жаттықтырып жүрген 19 жастағы жігіттің өзіне азғындық жасағанын айтып берген.
"Жаттықтырушы қыз балаға ата-анасына ештеңе айтпауды бұйырып, бұл екеуінің өзара құпиясы екенін айтқан. Сөйтіп, кішкентай қыз бапкердің айтқанын орындап жүрген. Бала орталыққа 2021 жылдың қыркүйегінен бастап барады, ата-анасы оны соңғы 3-4 айдан бері зорлыққа ұшырап келген деп есептейді", – деп жазады қор белсенділері.
Айта кетсек, күдікке ілінген жігіт 18 жасында ашихара-каратэден әлем чемпионы болған, ал 2021 жылдың қыркүйегінде балаларды жаттықтыра бастаған. Ол қысқа уақыт ішінде балалар мен ата-аналардың сеніміне кіріп, өзін жағымды адам ретінде көрсете білген.
"Әдетте сабақ кезінде ата-аналар балаларын залдың сыртында күтіп отырады. Сол жолы қыздың анасы мен тағы бір ата-ана сәл ертерек келіп қалып, жаттықтырушының жоқ екенін, ал балалардың жүгіріп, залда ойнап жүргенін байқайды. Артынша бапкер бейнекамера орнатылмаған киім ауыстыратын бөлмеден шығады, оның соңынан қыз бала шыққан. Кішкентай қыздың терлеп, шашы ұйпа-тұйпа болып қалғаны, киімі де дұрыс киілмегені көрініп тұрған. Анасы қызынан жаттықтырушымен не үшін киім ауыстыратын бөлмеде жүргенін сұрағанда, қызы "бұл – құпия" деп жауап берген. Жаттықтырушы қыздың жарысқа қатысқысы келіп жылағанын, ал өзінің оны жұбатқанын айтқан!" – дейді қор өкілі.
Белгілі болғандай, қазіргі уақытта баламен психолог жұмыс істеп жатыр.
Аталған жайтқа байланысты Маңғыстау облыстық полиция департаменті пікір білдіріп, қылмыстық іс қозғалғанын мәлім етті.
"Ақтау қалалық полиция бөліміне арызданған әйел кішкентай қызына қатысты азғындық әрекеттер жасаған азаматқа шара қолдануды сұрады. Аталған дерек сотқа дейінгі тергеп-тексерудің бірыңғай тізіліміне ҚР Қылмыстық кодексінің 124-бабының 3-бөлігі бойынша тіркелді", – деп хабарлады облыстық ДП.
Ведомство мәліметінше, күдікті ұсталып, уақытша ұстау изоляторына қамалды.
Сот-медициналық сараптама тағайындалды. Тергеу мүддесі үшін қалған мәліметтер жарияланбайды.