Биткоин бағасы алғаш рет 95 мың доллардан асты
Биткоин бағасы рекордтық деңгейге жетіп, 96 812 долларға дейін өсті. Бұл туралы Stan.kz ақпарат агенттігі хабарлайды.
Фото: pixabay.com
Криптовалюталар бойынша сауда көлемі ең үлкен Binance биржасында биткоин бір тәулікте 4,85% қымбаттап, 96 486 долларға жетті. Астана уақытымен сағат 09:15-тегі жағдай бойынша биткоин бағасы 96 812 долларға теңесті.
Айта кетейік, ай басынан бері өсім 36,49%-дан асты. Ал өткен жылмен салыстырғанда криптовалюта бірден 158,72%-ға қымбаттаған. Сол кезде бір биткоиннің бағасы шамамен 37 мың доллар болған.
Еске салайық, бұған дейін АҚШ-тағы президент сайлауында Дональд Трамп жеңіске жеткеннен кейін криптовалютаға қызығушылардың саны күрт артқан. Сонымен қатар бұл Трамптың өзінің сайлауалды кампаниясы кезінде цифрлық активтерді қолдауымен байланысты болып отыр. Ол АҚШ-ты "криптовалюта планетасына" айналдыруға және ұлттық биткоин қорын жинауға уәде берген еді.
