"Басы-қасында өзім жүрмін": Димаш Құдайбергеннің қарындасы отбасылық бизнесі туралы айтты
Өнерлі Айтбаевтар отбасының мүшесі, Димаш Құдайбергеннің қарындасы Раушан Құдайберген жеке кәсіпке бет бұрып жатқанын айтты. Бұл туралы Stan.kz ақпарат агенттігі хабарлайды.
Фото: https://www.instagram.com/raushan_kudaibergen/
Ол “Оян” бағдарламасына сұхбат беріп, жеке кәсіппен айналысып, мейрамхананы басқарып отырғанын жасырмады.
“Мейрамхана ашу отбасылық идея десем болады. Ата-анамның, әсіресе, әкемнің тарапынан туған ой. Соны біз де ұнатып, қостап, қолдап кеттік. Бірден құрылыс жұмыстарын жүргізіп, бизнес саласының қыр-сырын меңгеруге ізденіс жүргіздік”, – деді жас кәсіпкер.
Димаш Құдайбергеннің қарындасы ашылғанына жарты жыл болған мейрамхана жұмысына өзі басшылық жасап, келісім-шарт жасайтынын айтты.
“Идея ортақ болғанымен, басы-қасында өзім жүріп үйреніп кеттім. Барлық ұсақ-түйек шаруасына, ұйымдастыру жұмыстарына өзім араласамын. Әрине, негізгі шешімдер ата-анамнан болады. Бірақ күнделікті өзім бас-көз болып, ұжыммен сөйлесіп, басқарамын. Қазақ мәзірі, қазақ асханасы өте бай. Біз білмейтін мыңдаған тағам түрі бар. Оның бәрін түрлі этнографтар, ғалымдар зерттеген. Ал біздің мәзірде 66-дан астам тағам түрі бар. Жақында 30-ға жуық тағам түрін қосамыз”, – деді Раушан.
Еске салайық, RAMS Qazaqstan компаниясы Димаш Құдайбергеннің Ыстамбұл қаласында өткен концертіне қолдау көрсетті.