Бағасы төмендеген: Петропавлдағы машина жасау зауыты қайта сатылымға шығарылды

"Қазақстан инжинирингі" ұлттық компаниясы Петропавл ауыр машина жасау зауытын сатуды жоспарлап отыр. Кәсіпорын Кеңес дәуірінде республикадағы ең ірі қорғаныс өнеркәсібі орындарының бірі болған. Бұл туралы Stan.kz ақпарат агенттігі хабарлайды. 

Сауда-саттық 22 қыркүйекте өтеді. Акциялар пакетінің бастапқы бағасы 17,8 млрд теңге (шамамен 39,5 млн доллар) болады. Зауыттың 100 пайыз акциясын сату туралы лот электронды сауда-саттықтың e-Qazyna порталында жарияланған.

Сауда шарттарына сәйкес, сатып алушы алдымен ПМЖЗ-ның "Қазақстан инжинирингі" компаниясы алдындағы 31,6 млрд теңгеге жететін кредиторлық берешегін өтеуі тиіс. Бұл акциялар пакетінің бастапқы құнынан шамамен 1,8 есе көп. Сонымен қатар зауыттың одан әрі жұмыс істеуі мен дамуына қатысты міндеттемелер де сатып алушыға жүктеледі.

Петропавл ауыр машина жасау зауытын жекешелендіру әрекеттері 2022 жылдан бері жалғасып келеді. Сол кезде оның бастапқы бағасы 6,3 млрд теңге болған. Алайда сатып алушыларды бас компания алдындағы қарызды өтеу талабы алаңдатты. Биыл маусым айында зауытты 18,8 млрд теңгеге сату әрекеті де сәтсіз аяқталды. Енді баға тағы бір миллиард теңгеге төмендетілді.

17,8 млрд теңгеге инвестор 34,3 гектар жерді, 75 мың шаршы метрден астам өндірістік цехтарды және 1300-ге жуық жабдықты иеленеді. Алайда аумақты қойма ретінде пайдалану мүмкін болмайды. Байқау шарттары қатаң. Жаңа иесі зауыттың өндірістік бейінін толық сақтауға, мемлекеттік қорғаныс тапсырысын орындауға, миллиардтаған қарызды өтеуге және жұмыс орындарын сақтауға міндетті.

Оқыңыз

Астанада олигархтардан тартып алынған үйлер сатылымға шықты Оқыңыз

Петропавл ауыр машина жасау зауытының тарихы 1948 жылы астық тиегіштер шығаратын бейбіт кәсіпорын ретінде басталды. Алайда 1962 жылдан бастап зауыт Кеңес Одағының ең құпия әскери нысандарының біріне айналды. Өндірістің шарықтау кезеңінде қорғаныс өнімдері жалпы өндіріс көлемінің 90 пайызына дейін жетті.

Мұнда баллистикалық зымырандардың қозғалтқыш корпустары, "Скад" кешенінің элементтері, "Ока" зымыран кешендерінің ұшыру қондырғылары және аты аңызға айналған "Точка-У" зымыран кешендері шығарылды. 1970 жылдардың соңына қарай кәсіпорын 14 мың қызметкері бар, өзінің авиациясы, емханалары мен мәдениет үйлері болған нағыз "мемлекет ішіндегі мемлекетке" айналды.

КСРО ыдырап, өндірістік байланыстар үзілгеннен кейін Петропавл ауыр машина жасау зауыты зымырансыз жұмыс істеуге бейімделуге мәжбүр болды.

Зауыт күрделі конверсиядан өтіп, мұнай-газ саласына арналған жылжымалы бұрғылау қондырғыларын, энергетика және теміржол салаларына қажетті жабдықтарды шығаруға қайта бағытталды. 2003 жылы кәсіпорын "Қазақстан инжиниринг" ҰК" АҚ құрамына кіріп, онда ауқымды жаңғырту жұмыстары жүргізілді.

Алайда бірегей машина жасау құзыреттерін сақтап қалу жеткіліксіз болды. Кеңес дәуірінен қалған алып цехтарға ауқымды сериялық тапсырыстар қажет еді. Ірі келісімшарттар болмаған кезде пайдаланылмай тұрған өндірістік қуаттарды ұстауға кететін шығын барлық пайданы жеп қойды. Зауыт созылмалы қарызға батып, қысқартылған жұмыс аптасына көшті, ал нақты қызметкерлер саны 300 адамнан да азайды. Соңғы үш жылда ғана кәсіпорын шамамен 4 млрд теңге таза шығынға ұшыраған.