"Ауыл" партиясының ресми делегациясы Душанбедегі "Female Founders Forum 2026" халықаралық форумына қатысты

"Ауыл" партиясының ресми делегациясы Тәжікстан Республикасының астанасы Душанбе қаласында өткен "Female Founders Forum Tajikistan 2026" ауқымды халықаралық форумының жұмысына қатысты. Халықаралық алаң Орталық Азия елдерінен, Ұлыбритания мен БАӘ-ден келген әйел көшбасшылардың, кәсіпкерлердің, инвесторлардың, мемлекеттік органдардың, халықаралық ұйымдар мен саяси партиялардың өкілдерінің басын қосты.

Ауқымды халықаралық форумда Қазақстанның ресми делегациясын "Ауыл" партиясы Орталық аппараты басшысының орынбасары, партияның Әйелдер қанатының жетекшісі, сондай-ақ ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның мүшесі Айгерім Сарсенбаева бастап барды.

Форумның жұмыс күн тәртібі аясында ол негізгі баяндама жасап, Қазақстандағы әйелдердің әлеуметтік-саяси жағдайы, олардың мүмкіндіктері мен қазіргі қоғамдағы өсіп келе жатқан рөлі туралы жан-жақты ақпаратты ұсынды. Спикер өз сөзінде Президент Қасым-Жомарт Тоқаевтың ауқымды конституциялық реформаларына ерекше тоқталды. Мемлекеттік қайта құрулардың әйелдердің құқықтары мен мүмкіндіктерін кеңейтуге, сондай-ақ олардың елдің саяси, экономикалық және әлеуметтік өміріндегі маңызды шешімдерді қабылдау процестеріне белсенді араласуына тікелей әсері егжей-тегжейлі ашып көрсетілді.

Баяндамада ауыл әйелдерінің жағдайын, әлеуетін және оларды жан-жақты қолдау мәселелерін жария ету бөлек әрі негізгі блок ретінде қамтылды. Партия тарапынан іске асырылып жатқан шаралар мен бастамалар айтылып, ауылдық аумақтарды дамытудың өңірдегі әйелдер кәсіпкерлігі мен көшбасшылығын ілгерілету үшін стратегиялық маңызды әрі перспективалы бағыт ретіндегі әлеуеті белгіленді.

Делегацияның форумға қатысудағы басты мақсаттары -Орталық Азиядағы өңірлік ынтымақтастықты нығайту, әйелдер көшбасшылығы институттарын ілгерілету және халықаралық деңгейде цифрлық трансформация мен кәсіпкерлік бастамаларды қолдау саласындағы озық тәжірибелермен алмасу болды.