Атыраудағы бір отбасының өлімі: Ақбаян Мұқанғалиева емханадан шығып, балаларымен кездесті
Атырауда туыстарының қазасынан кейін психикалық денсаулық орталығында ем қабылдаған Ақбаян Мұқанғалиева ауруханадан шықты. Ол балаларымен екі рет кездесіп үлгерген. Алайда әйелдің ем-домы әлі де жалғасуы мүмкін. Бұл туралы Stan.kz ақпарат агенттігі хабарлайды.
Мұны Атырау облыстық Кәмелетке толмағандарды бейімдеу орталығының директоры Құндыз Ғиниятова мәлімдеді.
Оның айтуынша, Ақбаян Мұқанғалиева Атырау облыстық психикалық денсаулық орталығында ем қабылдаған. Қазір ол медициналық мекемеден шығарылған. Әйел ұзақ уақыттан кейін алғаш рет балаларын көріп, олармен екі рет кездескен.
Ақбаян емін қайта жалғастыруы мүмкін
Күндыз Ғиниятованың сөзінше, Мұқанғалиеваның емделуі мұнымен аяқталмауы мүмкін. Әйелдің туыстары оның психикалық денсаулық орталығына тағы 10 күнге жатуды жоспарлап отырғанын айтқан.
“Алғаш рет ол балаларға өткен аптада келді. Жақында, бір-екі күн бұрын, екінші рет келіп, ауруханаға тағы он күнге жататынын айтты. Екі жолы да анасымен және туыстарымен бірге кешкі уақытта келді. Бірінші рет шамамен 19:30-да, екінші рет 20:30 шамасында”, – деді Күндыз Ғиниятова.
Ол кезде орталықта кезекші тәрбиешілер болған. Олар Ақбаянға балаларымен кездесіп, уақыт өткізуге мүмкіндік берген.
“Балаларын көптен бері көрмегендіктен, кездесуге рұқсат бердік. Оған бас тарта алмадық. Балаларын көрсін, өйткені олар да анасын күтіп жүр”, – деді орталық директоры.
Балаларын өзімен бірге алып кете ала ма?
Қазір Ақбаян Мұқанғалиеваның төрт баласы – 10, 8, 5 және 4 жастағы балалары Кәмелетке толмағандарды бейімдеу орталығында тұрып жатыр. Ал бір жарым жастағы кенже ұлы мамандандырылған сәбилер үйінде.
Күндыз Ғиниятованың айтуынша, әйел емдеудің келесі кезеңінен өткеннен кейін мамандар оның жағдайын қайта бағалауы керек.
“Одан кейін оның жағдайын тағы бір рет бағалау қажет. Егер жағдайы жақсы болса, анасы балаларын өзіне алып кетуі мүмкін”, – деді ол.
Балалардың жағдайы қалай?
Орталық мәліметінше, балалардың денсаулығы қанағаттанарлық, эмоционалдық жағдайы тұрақты.
Үш бала орталыққа 2 ақпанда орналастырылған. Тағы бір қызы 9 сәуірде сәбилер үйінен Кәмелетке толмағандарды бейімдеу орталығына ауыстырылған. Ал кенже ұлы әзірге сәбилер үйінде қалып отыр.
Үлкен балалары оқуын жалғастырып жатыр. 10 жастағы қызы төртінші сыныпта, ал 8 жастағы ұлы үшінші сыныпта оқиды. Мұғалімдер орталыққа арнайы келіп, балаларға сабақ кестесіне сәйкес білім береді.
“Тәрбиеленушілердің білім беру процесінен қол үзіп қалмауы және олардың білім алу құқығын қамтамасыз ету мақсатында оқу-тәрбие жұмыстары жүйелі түрде ұйымдастырылған”, – деп хабарлады орталық.
Тазы мен төбеттің қазақ үшін қадірі неде және тұқымы қалай сақталып келеді
