Атырауда жаңа туған нәрестелерге Тасқынбек пен Тасқынби есімі қойылды
Атырау облысы денсаулық сақтау басқармасы табиғи сипаттағы төтенше жағдай жарияланғаннан бері 1846 сәбидің өмірге келгенін мәлімдеді. Бұл туралы Stan.kz ақпарат агенттігі хабарлайды.
Фото: pixabay.com
Өңірдегі денсаулық сақтау басқармасының мәліметінше, сәбилердің арасында 961 ұл, 885 қыз бар.
Облыстық азаматтық хал актілерді тіркеу басқармасының басшысы Алмагүл Төремұратова атыраулық бір отбасы тұңғыш балаларын Тасқынби деген есіммен атауды құп көргендерін айтады.
"Атырауда бір отбасы дүниеге келген тұңғыш ұлын Тасқынби есімімен атауды жөн көріп отыр. Ал Индер ауданындағы сәбидің біріне Тасқынбек есімі қойылды. Бұл – отбасындағы сегізінші бала", - дейді облыстық азаматтық хал актілерді тіркеу басқармасының басшысы Алмагүл Төремұратова.
Айта кетейік, екі ұл да бір күнде өмірге келген. Нәрестелердің туған күні – 29 сәуір.
Соңғы статистикалық деректерге сүйенсек, шаһарда Мұхаммад есімі көп берілген. Жыл басынан бері 32 сәби аталған есімді иеленіп отыр. Ал, 19 балаға Хамза, 15 ұлға Айсұлтан есімімен туу туралы куәлік алынған.
Еске салайық, бұған дейін 2024 жылдың 1 қаңтарындағы жағдай бойынша Қазақстанда 18 жасқа дейінгі балалар саны – 6 841 527 адам екенін жаздық. Оның 3,5 миллионы ұлдар болса, 3,3 миллионы қыздар. Балалардың басым бөлігі, яғни 59,7 пайызы қалада тұрады.