Атырау облысында тас жол опырылып, көлік шұңқырға түсіп кетті (видео)

"Атырау-Индер" тас жолында көліктің шұңқырға түсіп кеткені туралы видео пайда болғаннан кейін өңірде көлік қозғалысына шектеу қойылды. Бұл туралы Stan.kz ақпарат агенттігі хабарлайды.

Фото: Атырау облысы ТЖД жедел әрекет ету орталығының баспасөз қызметі

Желіде тараған видеодан жүк көлігі жолдың опырылған бөлігіне тіреліп, тоқтап қалғанын байқауға болады. Ал жанында жеміс-жидек шашылып жатыр. 

Атырау қаласы әкімінің орынбасары Нұржан Ермұхановтың айтуынша, бұл аумақта жедел қалпына келтіру жұмыстары жүргізіліп жатыр. Жолдың 27-шақырымы уақытша жабылды. 

"Талдыкөл ауылындағы газ құбырының айналасынан су ағып, топырақ пен трассаның опырылуына әкеп соқты. Зардап шеккендер жоқ. Газ құбырының немесе газ таратудың зақымдануы туралы деректер тіркелген жоқ. Қазір Атырау облысы жолаушылар көлігі және автомобиль жолдары басқармасының мамандары жедел қалпына келтіру жұмыстарын жүргізіліп жатыр. Бүгін, 17 мамыр күні кешке қарай жол толығымен қалпына келтіріледі", –деді Атырау қаласы әкімінің орынбасары Нұржан Ермұханов.

• Астанада ғимараттың қасбеті баланың үстіне опырылып түскен (видео)

• Жер опырылып кеткен: Қостанай облысында ерекше табиғи құбылыс табылды

Жолды қалпына келтіру жұмыстарына 4 бірлік арнайы техника мен 15 маман жұмылған.

Еске салайық, 14 мамырда Алматы облысының Қарасай ауданында "Аюсай" бөгетіне таяу жерде 3,5 текше метр топырақ опырылып түскенін жазған едік. Қуанышқа орай, оқиғадан ешкім зардап шеккен жоқ.