Алматы тауларындағы шаңғы курорты: Жобаны кім салатыны және қашан іске қосылатыны белгілі болды

Алматы тауларында салынатын Almaty SuperSki жобасы дайындық кезеңінен іске асыру кезеңіне өтті. Алаңда құрылыс жұмыстары басталды, тау шаңғысы курортын іске қосу 2028 жылдың желтоқсанына жоспарланған. Бұл туралы Stan.kz ақпарат агенттігі хабарлайды.

Премьер-министр Олжас Бектенов Алматы тау кластерін дамыту мәселелері бойынша Kazakh Tourism Development Ltd компаниясы директорлар кеңесінің отырысын өткізді. Отырыста компанияның бас атқарушы директоры Ержан Еркінбаев Almaty SuperSki жобасын жүзеге асырудың қазіргі жай-күйі туралы баяндады.

Жиында жобаның негізгі нысандарын жобалау және салу мәселелері бойынша бірқатар шешім қабылданған. Атап айтқанда, ашық конкурс шеңберінде аспалы жолдар салу, ғимараттардың конструкциялық жобалануы және өзге де бағыттар бойынша халықаралық жетекші компаниялар айқындалды. 

Негізгі шешімдердің бірі 11 аспалы жолдың құрылысын жүзеге асыратын мердігерді анықтау болды. Ол үшін аспалы жол жүйелерін өндірушілер арасында ашық конкурс өткізілген. Конкурс барысын PGI, Hill International және DCSA сияқты халықаралық кеңесшілер бақылап отырған.

Жеңімпаз ретінде бұл саладағы әлемдік көшбасшылардың бірі француздық POMA компаниясы танылды. Үкіметтің мәліметінше, компания 1936 жылдан бері жұмыс істеп келеді және әлемнің 90 елінде 8 мыңға жуық жобаны жүзеге асырған. 

Almaty SuperSki жобасы аясында 3S жүйесіндегі гондолалы аспалы жолдар, 10 орындық гондолалы желі және креслолы көтергіштер секілді түрлі типтегі аспалы жолдар салу жоспарланған.

Оқыңыз

Көкжайлаудағы тау шаңғысы курорты Шымбұлақтан 3 есе үлкен болады: Қоғам белсенділері жобаны неге сынға алып жатыр? Оқыңыз

Сонымен қатар жобада заманауи ағаш конструкцияларын пайдалану да қарастырылған. Олар халықаралық Foster + Partners сәулет бюросы әзірлеген архитектуралық тұжырымдаманың маңызды бөлігі.

Конструкцияларды жобалау мен өндірудің сапасын қамтамасыз ету үшін бүкіл әлем бойынша бірегей нысандарды жүзеге асыруда айтарлықтай тәжірибесі бар жаппай ағаштан жасалған инженерлік шешімдер саласындағы жетекші әлемдік компаниялардың бірі StructureCraft (Канада) компаниясымен ынтымақтастық туралы шешім қабылданды.

Жобаның құрылысын дайындау және кейінгі іске асыру кезеңін басқару үшін америкалық Hill International компаниясы тартылды. Ол жобалық жұмыстарды үйлестіруге, құрылыс барысын бақылауға, жұмыс кестесінің сақталуына және басқа да үдерістерге жауап береді.

Олжас Бектенов жобалау мерзімі мен сапасына қатаң бақылауды, қауіпсіздік пен экологиялық жауапкершіліктің халықаралық стандарттарын сақтауды қамтамасыз етуді тапсырды. 

Үкіметтің мәліметінше, Almaty SuperSki жобасын жүзеге асыру тау кластерінің әлеуетін ашады, туристік саланың дамуына елеулі серпін береді және қызмет көрсету саласы мен сабақтас салаларға кең мультипликативтік әсер етеді. 

Бекітілген кестеге сәйкес алаңда құрылыс жұмыстары басталды. "Almaty SuperSki" тау шаңғысы курортының іске қосылуы 2028 жылдың желтоқсанына жоспарланған.

Еске салсақ, бұған дейін экологтар Көкжайлауда салынатын "Алматы тау кластері" және Almaty Superski жобаларының құрылысын тоқтатуды талап еткен еді. Мамандар бұл жобалар заң бұзушылықтармен дайындалып, іске асып жатқанын айтады. Экологтар жобаны жүзеге асырып жатқандар жаңа сайлау кезеңі басталғанға дейін құрылысты толығымен заңдастыруға асығатынын ерекше атап өтті.