Алматыда микроқаржы ұйымының кесірінен 327 мыңнан астам адам зардап шекті
Қаржы мониторингі агенттігі Алматыда 6 микроқаржы ұйымының заңсыз қызметі әшкереленгенін мәлімдеді. Бұл туралы Stan.kz ақпарат агенттігі хабарлайды.
Фото: Видеодан скрин
Қаржы нарығын реттеу және дамыту агенттігінің шешімімен екі компания микроқаржылық қызметті жүзеге асыру лицензиясынан айырылды. Сонымен қатар тағы төрт аффилирленген микроқаржы ұйымына қатысты тексеру жүргізіліп жатыр.
Белгілі болғандай, 6 микроқаржы ұйым бір құрылым ретінде жұмыс атқарған, олар бір кеңсені пайдаланып, онда 200-ден астам қызметкер жұмыс істеген. Ал олардың қызметі шетелдік азаматтардың бақылауында болған.
Сот қарыз алушылардың 130 кепілдік шартын жарамсыз деп тану туралы талаптарын қанағаттандырды. Осылайша, азаматтар міндеттемелерден босатылды, ал микроқаржы ұйымы алынған қаражатты қайтаруға міндеттелді.
Микроқаржы ұйымының кесірінен 327 мыңнан астам адам зардап шекті, келтірілген залал 30 миллиард теңге болады. Агенттіктің бастамасымен Алматы қаласының прокуратурасы 327 мың азаматтың мүддесі үшін сотқа арыз түсірді. Тергеу жалғасып жатыр.
Еске салайық, бұған дейін Алматыда микроқаржы ұйымдары клиенттерінің қарызын бірнеше есе өсіріп, кепілдік шарттарын жасауға мәжбүрлеген. “Creditum” МҚҰ, “Sofi Finance” МҚҰ, “Hava Finance” МҚҰ, “SF Offline” МҚҰ, “POS Credit” МҚҰ, “Сәлем Кредит” МҚҰ басшылығына қатысты алаяқтық және заңсыз кәсіпкерлік қызмет бойынша тергеу жүргізіліп жатыр. Қарыз алушылар несиенің бастапқы сомасынан 3-5 есе көп төлем жасауға мәжбүр болған.