"Ол адамдардың вирусты жұқтыруына нақты қауіп төндірді": Алматыда бас санитарлық дәрігердің қызметінен кетуі туралы мәселе көтерілді
Алматының қоғамдық кеңесі әкім Бақытжан Сағынтаевтан тауарлар мен қызметтердің сапасы мен қауіпсіздігін бақылау департаментінің басшысы Айзат Молдақасымоваға қатысты қызметтік тексеру жүргізуді сұрады, деп хабарлайды Stan.kz ақпарат агенттігі.
"Алматы қаласының қоғамдық кеңесі қаланың бас санитарлық дәрігері Айзат Молдақасымованың карантин тәртібін өзі бұзғанын кәсіби және қызметіне сай емес деп есептейді.
Егер қаланың бас санитарлық дәрігері жұқтырғандармен бірге ұшып келіп, карантинге емес, бірнеше күн жұмысқа және кеңеске барса, оны осындай лауазымдарды атқаруға тыйым салумен жұмыстан босату керек", - деп жазды Марат Шибутов Facebook парақшасында.
Ол Алматы әкімі Бақытжан Сағынтаевтың атына Молдақасымованың атқарып отырған лауазымына сәйкестігі туралы мәселені қарастырумен тергеу жүргізу туралы өтініш жазған болатын.
"Өзінің әрекетімен (бұқаралық іс- шараларға, кеңестерге, қоғамдық кеңес отырыстарына, атқарушы органдардың отырыстарына қатысу) Айзат Молдақасымова көптеген адамдардың вирустық инфекцияны жұқтыруына нақты қауіп төндірді. Мұндай мінез- құлық пен өзінің кәсіби борышына деген көзқарасты барлық қазақстандық мамандар үшін жол беруге болмайтын үлгі деп санаймыз ", - делінген хатта.
Еске сала кетейік, Алматы қаласының бас санитарлық дәрігері Германия арқылы транзитпен карантин жарияланған мемлекеттер тізіміне кірмеген басқа елден ұшып келген. Онымен бір ұшақта ұшқан адамнан коронавирус анықталған. Кейіннен Айзат Молдақасымованың үйде карантинде болғаны айтылды.