Алматыда аялдамалардың бірінде қарияны таяқпен ұрған жас жігіт іздестіріліп жатыр (видео)
Алматы полициясы аялдама маңында қарт адамды таяқпен ұрып кеткен жүргізушіні іздестіріп жатыр, деп хабарлайды Stan.kz ақпарат агенттігі.
Бұл туралы қалалық полиция департаменті бастығының тергеу бойынша орынбасары Рустам Әбдірахманов хабарлады.
Видео әлеуметтік желілерде бір күн бұрын пайда болды. Кадрдан жас жігіттің көлігінен түсіп, жол бойында тұрған қарт кісіні таяқпен ұрған сәтін көруге болады.
БАҚ пен әлеуметтік желіге мониторинг жасау барысында жүргізушінің қарияны ұрған сәті түскен видео анықталды. Алматы полиция департаменті тергеу басқармасы бұл факті бойынша процессуалды тексеріс бастады.
"Жазаның бұлтартпастығы қағидатын іске асыра отырып, қазіргі таңда күдіктіні ұстау шаралары қабылданып жатыр. Тексеріс барысы мен нәтижесі Алматы полиция департаментінің бақылауына алынды", – деп жазды Әбдірахманов желіде.
Құқықбұзушыға қандай шара қолданылатыны жайлы қосымша хабарланады.