"Алматы облысының әкімдігі ойынхана ғимаратына көшеді": Әкімдік желіде тараған ақпаратқа қатысты пікір білдірді

Алматы облысында әкім аппараты Қапшағайдағы казинолардың бірінің ғимаратында орналасады деген ақпаратты жоққа шығарды, деп хабарлайды Stan.kz ақпарат агенттігі. 

"Бұл – жалған ақпарат, қауесет сөз. Қазір жұмыс комиссиясы құрылып,  қаладағы әртүрлі нысанды қарап жатыр. Әкім аппараты орналасатын ғимарат әлі қаралып жатыр", –  деді облыс әкімдігінің баспасөз хатшысы Руслан Сарсеев.

Айта кетері, бұған дейін президент Қасым-Жомарт Тоқаев 16 наурызда ел халқына жолдауы кезінде бірнеше жаңа облыс құру туралы шешімді хабарлады. Соған сәйкес Алматы облысының құрамынан Жетісу облысы бөлініп шығады. Алматы облысының орталығы Қапшағай қаласы болады, қалаға Дінмұхамед Қонаев есімін беру ұсынылды.

Жаңадан құрылатын Жетісу облысының аумағында 352 елді мекені бар 8 аудан және 2 қала кіреді. Алматы облысында 380 елді мекені бар 9 аудан және 1 қала болады.