"Аш, жалаңаш": Алматы облысында өгей әкелерінен қорлық көрген балалар табылды
Алматы облысында прокурорлар рейдтік іс-шаралардың нәтижесінде көптеген балалар құқығының бұзылу фактілерін анықтады. Бұл туралы Stan.kz ақпарат агенттігі хабарлайды.
Фото: freepik.com
Рейдтік іс-шаралардың нәтижесінде Іле ауданында аштықтан әбден азып кеткен, сөйлемейтін, жүре алмайтын 6 жасар бала табылды. Бала екі еселенген пневмония диагнозымен аудандық ауруханаға шұғыл түрде жатқызылып, медициналық көмек көрсетілді.
"Ата-аналар ҚР ӘҚБтК-нің 127-бабының 2-бөлігі "Кәмелетке толмаған баланы тәрбиелеу және (немесе) оқыту, құқықтары мен мүдделерін қорғау жөніндегі міндеттерді орындамау" бойынша әкімшілік жауапкершілікке тартылды. Қамқоршылық органы ата-ана құқығын шектеу туралы талап арыз берді", – делінген прокуратура хабарламасында.
Райымбек ауданында үш балалы отбасы анықталды, олар да аштықтан зардап шеккен. Оларға медициналық көмек көрсетілді, қыстық киімдер алынды, шыққаннан кейін екі бала балабақшаға барады, үлкен бала интернатқа орналастырылды.
"Балқаш ауданында өгей әкесі ұрып-соққан үш отбасының балалары анықталды. Полиция қылмыскерлерге қатысты ҚР ӘҚБтК-нің 73-2-бабы "Ұрып-соғу" бойынша әкімшілік іс қозғады", – делінген хабарламада.
Бірлескен рейдтер нәтижесінде тәрбиелік міндеттерін орындамағаны, алкогольдік ішімдіктер ішкені, кәмелетке толмағандардың түнгі уақытта заңды өкілдерінің еріп жүруінсіз ойын-сауық мекемелерінде немесе үйден тыс жерде болғаны үшін барлығы 51 ата-ана әкімшілік жауапкершілікке тартылды.
Ата-аналардан 15 бала алынып, жетеуіне қатысты ата-ана құқығын шектеу туралы талап-арыз сотқа жолданды.