Алматы әуежайының жаңа терминалы алғашқы рейстерді қабылдады

Алматыдағы әуежайдың жаңа терминалы рейстерді қабылдап үлгерді. Бұл туралы Stan.kz ақпарат агенттігі хабарлайды.

Фото: Ақорда

Президент Қасым-Жомарт Тоқаевтың 2023 жылғы 1 қыркүйектегі жолдауына сәйкес көлік-логистика саласы еліміздің экономикалық дамуының локомотивтерінің бірі болуға тиіс. Соған сай Алматы әуежайында жаңа терминал ашылды.

Жаздың бірінші күні Алматы әуежайының жаңа терминалы
алғашқы рейстерді қабылдады.

"Air Astana әуекомпаниясының Лондон-Алматы бағыты бойынша ұшқан әуе кемесі таңғы 8:50-де әуежайға келіп қонды (КС-664 рейсі). Әуе кемесінде  94 жолаушы болды. Ал сағат 09:50-де алғашқы болып Алматы-Доха бағыты бойынша Air Astana әуе компаниясының әуе кемесі ұшты (КС-653). Бортта 166 жолаушы бар”, – делінген хабарламада.

Әуежай атынан жаңа терминалдың алғашқы жолаушыларына естелік сыйлықтар табысталды.

Алматы әуежайындағы жаңа терминалының құрылысы 2021 жылдың мамырында басталды және толығымен инвестиция есебінен жүзеге асырылды. Терминалдың аумағы – 53 мың шаршы метр.

Жаңа терминалда 7 телескопиялық трап, 50 тіркеу тірегі, 6,2 мың багажды өңдеуге арналған 4 лента қарастырылған. Ол жылына 14 млн жолаушыны өткізуге қабілетті. 

Алдағы уақытта әуежайдан 10 елге 15 халықаралық маршрут бойынша отандық және шетелдік компаниялар қатынайды.