АҚШ-тың барлау қызметі Путин ұзақ соғысқа дайындалып жатыр деп мәлімдеді
АҚШ барлау қызметі таратқан мәліметтер бойынша, Ресей президенті Владимир Путин ұзақ соғысқа дайындалып жатыр, ол Донбасс аумағында жеңіске жетуден үмітін әлі үзбеген, деп хабарлайды Stan.kz ақпарат агенттігі.
10 мамырда әлемдегі қауіп-қатерлерге арналған сенаттың қарулы күштер жөніндегі комитет тыңдауында АҚШ ұлттық барлау қызметінің директоры Эврил Хэйнс осылай деп мәлімдеді.
АҚШ барлау қызметінің айтуынша, Ресейдің Украина шығысына әскерін шоғырландырып, сол жаққа баса мән беруі уақытша қадам болуы мүмкін. Ресей басшысы Донбастан өзін республика жариялап алған Приднестровьеге дейінгі аралықты бақылауға алып, "құрғақ көпір" орнатуды көздейді. Келесі айларда қақтығыс ауқымы кеңейіп, оның бағытын да болжау қиынға соғуы ықтимал. Эврил Хэйнстің сөзінен Bloomberg агенттігі үзінді келтірген.
Агенттік сонымен бірге АҚШ қорғаныс министрлігі жанындағы барлау басқармасының директоры генерал-лейтенант Скотт Берриердің сөзіне де назар аударады. Ол Ресейдің Украина соғысындағы сәтсіздігі Мәскеуді әлсіреткенмен Ресей билігінің АҚШ пен одақтастарына қарсылығын үдете түседі деп болжайды. Бұған қоса, ядролық қару қолдану туралы қауіп жиі айтыла бастайды деп санайды.
Эврил Хэйнс сөзіне сүйенген CNN телеарнасының хабарлауынша, Владимир Путиннің амбициясы мен Ресей армиясы потенциалының сәйкессіздігі Мәскеуді Украинадағы соғыста "жағдайға қарай бейімделуге" итермелеп отыр. Хэйнс осының бәрі Ресейде әскери жағдай жариялау ықтмалдығын да арттырып отыр дейді.