5500 теңгеден бастап: Құралай Нұрқаділова арзан киімдер сата бастады
Oтандық дизайнер Құралай Нұрқаділова қолжетімді баға арқылы жаңа топтамасын «хитке» айналдырмақ. Тіпті, сәнгердің өз тұтынушыларына тиімді ұсынысы да дайын.
Отандық сән әлемінің алғашқы қарлығашы — Құралай Нұрқаділова әріптестері арасында әдеттегідей бірінші болып, өз саласында төңкеріс жасамақ, деп хабарлайды НТК арнасының «Ревю» бағдарламасы.
Дизайнер бұдан былай сапалы дүниелерді қолжетімді, арзан бағамен ұсынуға ниетті.
«Мен бұл топтаманы «Гардероб» деп атадым. Себебі ұсынып отырған киімдерім әр адамның гардеробында кездеседі. Олардың сапасы люкс болғанымен бағасы қолжетімді. Яғни, кез-келген адам сатып ала алады», – дейді Құралай Нұрқаділова.
Сәнгер, аталмыш топтаманың тұтынушы сұранысынан туындағанын жасырмайды. Себебі, әдемі киінуге әркімнің-ақ бар таласы.
«Жеңіл жейделердің бағасы 5500 теңге. Жалпы, осы топтамадан киіну үшін 15000-ға жуық теңгеңіз болса жеткілікті. Ал, ең қымбат дегенде шамамен 35000 теңге болып қалар», – дейді Нұрқаділова.
Ұзақ уақытқа көзден таса болған дизайнер, ең соңғы рет Динара Сәтжан ұйымдастырған «MONACO fashion nite » -та өзінің жеке коллекциясымен төбе көрсеткен болатын.
Отандық 7 сән үйін бір алаңға жинаған көрсетілімде Құралай Заманбекқызының қатысуы тегін емес. Себебі, ол осы сәттен Динара Сәтжанмен бірлескен жұмысын бастап кеткен.
«Біз Динара Сәтжан екеуіміз серіктестік жөнінде 5 жыл бұрын сөйлескен болатынбыз. Алайда, ол кезде коллекциямыз дайын болмады. Енді, көріп отырғандарыңыздай бірге жұмыс істейміз», – дейді сәнгер.
Құралай Нұрқаділова жеке колекциясының арнайы көрсетілімін ұйымдастыруға әлі асықпайды. Айтуынша, онсыз да жеке әрі мемлекеттік тапсырыстары көп. Алайда, дизайнер халықты қолжетімді киіммен қуантуға уақыт табуға мүдделі.
Жіберіп алмаңыз:
Санжар Мәдиевтің досымен түскен суреті елдің ойын сан-саққа жүгіртті
Талай жігіт сөз салған: Танымал журналист не себепті әлі күнге дейін тұрмыс құрмағанын түсіндірді
Анасының қызы: Айару Бақытбектің купальникпен түскен суреті желіні шулатты