18 жасқа толған қазақстандықтың шотында Ұлттық қордан қанша қаржы жиналады

Қаржы вице-министрі Дәурен Темірбеков 18 жасқа дейін балалардың шотына Ұлттық қордан қанша ақша жиналатынын айтты, деп хабарлайды Stan.kz ақпарат агенттігі. 

Енді Ұлттық қордың инвестициялық табысының 50%-і 18 жасқа дейінгі балалардың шотына аударылады. Бала дүниеге келген соң әділет министрлігі Жеке тұлғалардың деректері базасы негізінде шот автоматты түрде ашылады. Ұлттық қордың инвестициялық табысы баланың шотында 1 қаңтарда аударылып тұрады.

"Жекелеген кезеңдерде инвестициялық кіріс теріс мәнде қалыптасуы мүмкін екенін ескеріп, инвестициялық табыстың ставкасын өткен жылдардағы орташа жылдық мән негізінде айқындау жоспарланып отыр. Болжамдық бағалаулар бойынша мұндай әдіс бағдарламаға туған сәттен бастап қатысқан балаға 150-160 АҚШ доллары мөлшерінде 18 жылсайынғы төлем алуға мүмкіндік береді", - деді Темірбеков сенатта өткен отырыста.

Ұлттық банк Ұлттық қордың өткен жылдардағы орташа кірісін ескеріп, инвестициялық табыстың 50%-ін есептейді.

"Инвестициялық табыстың ставкасын 18 жылдағы орташа жылдық мән деңгейінде айқындау ұсынылып отыр. Сонда баланың (18 жасқа толғанда) жинаған сомасы 3500 долларды құрайды деп болжанып отыр", - деді вице-министр.

Қазақстандық 18 жасқа толғанға дейін ақша Ұлттық қорда болады және қаржы құралдарына инвестицияланады.

Бұған дейін "Ұлттық қор – балаларға" жобасы аясында қордың инвестициялық табысынан жиналған ақша шотта бала 18 жасқа толғаннан кейін 5-10 жыл ғана сақталатынын жазған болатынбыз.