Фото: Жаппай тәртіпсіздіктерден кейінгі Қызылорданың жағдайы қандай?

Елімізде орын алған жаппай тәртіпсіздіктерден кейін қызылордалықтар қалыпты өмірге оралуда. Өңірде тонаушылардың заңсыз әрекеттері салдарынан мемлекеттік мекемелерге көп зақым келген. Халықтың қауіпсіздігін қамтамасыз ету мақсатында облыс бойынша 28 бекеттің қызметі  ұйымдастырылды. Тәртіп сақшылары мен әскери қызметкерлер қатаң жұмыс режимінде еңбек етуде. Бейберекетсіздікке барған 62 адам қамауға алынды, деп хабарлайды Stan.kz ақпарат агенттігі.

Қызылордада жаппай тәртіпсіздік 4 қаңтар күні басталған. Бір топ адамдар облыс орталығындағы сауда үйінің алдына жинала бастады. Тұрғындарды тарқату үшін облыс әкімі Гүлшара Әбдіхалықова шықты. Алайда аймақ басшысының сөзіне ешкім құлақ асқан жоқ. Ертеңіне бей-берекетсіздік басталып кетіп, тобырды тоқтату мүмкін болмай қалды.

"5 қаңтар күні жұмыстан түстен кейін қайтарып жіберді. Ауық-ауық атылған оқтың дауысын естідік. Қатты шошыдық, жақындарымыз үшін алаңдадық. Мұндай толқуды біз бұрын көрмеген едік", – дейді қала тұрғыны Балабай Ақпейілов.
Қызылорда облысында тәртіпсіздік салдарынан 10-ға жуық мемлекеттік мекемелерге қатты зақым келсе, 30-дан астам көлік өртке оранды. Облыс және қала әкімдеріне шабуыл жасалған. Әсіресе облыстық соттың, Nur Otan партиясы филиалының және Қызылорда қалалық полиция департаментінің ғимаратына қатты зақым келген. Қазір облыстық соттың кейбір мамандары басқа мекемелерде жұмысын жалғастыруда.

"Бүгінде ғимарат ішінде тазалық жұмыстары жүргізілуде. Жуырда күрделі жөндеу басталады. Тәртіпсіздік кезінде қымбат техникалар қолды болған. Компьютерлер мен телевизорлар ұрланған. Айта кету керек, маңызды құжаттар жойылған жоқ", – деп мәлімдеді Қызылорда облыстық сотының баспасөз хатшысы Ардақ Смағамбетова.

Қазіргі уақытта Қызылордада жағдай қалыпты. Қоғамдық көліктер қызметі ретке келтірілген. Ертеңнен бастап балабақшалар жұмысын бастайды. Базарлар, ірі сауда орындары мен кафе-ресторандар келушілерге қызмет көрсетуде. Облыс аумағында 28 пост-бекеті жұмысы ұйымдастырылған. "Антитеррор" операциясы әлі де жүргізілуде.

"Бүгінде құқық қорғау органдарына 391 адам жеткізілді, оның ішінде 62 адам қамауға алынды. Тәртіпсіздік кезінде оннан астам полицей жарақат алды, көз жұмған тәртіп сақшылары жоқ. Өкінішке қарай, 55/47 әскери бөлімінің сарбазы қайтыс болды. Қазір оның өліміне қатысты  күдікті қолға түсті", – деді Қызылорда облыстық полиция департаментінің баспасөз қызметі.