Ұлдана Мырзуанның өлімі: сотталушы сараптама туралы білген адамдар үйдегі пәтерлерді сатып жібергенін айтты

Сәуле Жұбаниязова фельдшер Ұлдана Мырзуанның өліміне қатысты сот отырысында үйдің сараптамасы туралы білгендер пәтерлерін сатып жібергенін айтты. Бұл туралы Stan.kz ақпараттық агенттігі хабарлайды.

Прокурорлардың сұрақтарына жауап берген Жұбаниязова үй тұрғындарына үйдегі жарықтарға қатысты қандай да бір ескерту жасалған болса, оның да, басқа тұрғындардың да бұл мәселеге алаңдап, дабыл қағатынын айтты. Айыпталушының сөзінше, былтыр оған пәтерін сатуды ұсынған.

"2025 жылы менің пәтерімді сатып алғысы келген адам болды. Анам баланы мектепке жақын жерге орналастыру үшін пәтерді сатуды жоспарлаған еді, өйткені ол бірінші сыныпқа барды. Алайда үйде жарықтар болмағандықтан, тұрғындар да шағымданбады, біз өзіміз де оларды байқамадық. Сондықтан пәтерді сатпадық”, – деді айыпталушы.

Сондай-ақ Жұбаниязова жарықтар туралы білген немесе өзі көрген болса, үйді сатып жіберетінін тілге тиек етті.

“Бұл сараптама туралы білген адамдар да солай жасайды. Екі ревизор, Ахметова және Жанпеисова пәтерлерін сатып жіберді. Олардың барлығы қазір біздің үйде тұрмайды. Ал мен бұл туралы білген адам ретінде ОСИ төрағалығын өз қолыма алдым. Мұның ешқандай қисыны жоқ. Мен бұл сараптама туралы білмедім", – деп түсіндірді ол.

Сонымен қатар, ол үйдің қасбетін жөндеуге 800 мың теңге бөлінгенін айтты. Алайда бұл қаражат қасбеттің төменгі бөлігіндегі қабыршақтанып кеткен бояуды жаңартуға арналған болған.

"Оған 800 мың теңге қарастырылды. Бұл қасбетті жөндеуге арналған қаражат еді, бірақ кірпіш қалау жұмыстарын жөндеу туралы сөз болған жоқ. Былтыр бірінші қабаттың төменгі бөлігін бояу үшін мамандарға жүгіндім. Олар жөндеу құнын 2,5 миллион теңгеден жоғары деп есептеді, ал Ахметова 800 мың теңге ғана қарастырған. ОСИ құрылған кезде маған жинақ шотындағы 1 миллион 96 мың теңге берілді. Қалған қаражат менде болған жоқ, кассамды нөлден бастадым", – деді айыпталушы.

Еске салсақ, 2025 жылғы 8 қарашада Астанада тұрғын үй ғимаратының сыртқы қасбеті опырылып, бірнеше адам зардап шеккен еді. Оқиға орнына көмек көрсетуге барған 23 жастағы жедел жәрдем фельдшері Ұлдана Мырзуан ауыр жарақат алды. Дәрігерлер он күн бойы оның өмірі үшін күрескенімен, Ұлдана 18 қарашада көз жұмды. Кейін марқұмның күйеуі оқиғаға кінәлі адамдарды жауапқа тартуды талап етті.