Үкімет қосылған құн салығының мөлшерін 16 пайызға дейін көтеруді ұсынды

Үкімет қосылған құн салығы (ҚҚС) мөлшерлемесін 16% деңгейінде белгілеуді ұсынды. Бұл туралы Stan.kz ақпарат агенттігі хабарлайды. 

Фото: depositphotos.com

Қаржы министрі Мәди Такиев пен ұлттық экономика вице-министрі Азамат Әмрин бизнес өкілдерімен салық реформасы шеңберінде ҚҚС сараланған мөлшерлемелерін белгілеу жөніндегі үкімет ұсыныстарын талқылады.

"Біз мынадай механизмді қарастыруды ұсынамыз: жалпы белгіленген қосылған құн салығының мөлшері – 16%, ауыл шаруашылығы өнімдерін өндірушілерді ҚҚС төлеуден толық босату, ал кейбір салалар үшін аралық мөлшер – 10%. Осылайша, үкімет ұсынған мөлшерлемелер 16%, 10%, 0% және толық босатуды қамтиды", – деді ұлттық экономика вице-министрі Азамат Әмрин.

• Қосылған құн салығының өсуі кімдерге әсер етпейді – Премьер-министр түсіндірді

• "Көлеңкелі бизнес дамиды": Депутат қосылған құн салығының бірнеше есе көтерілетініне қарсы шықты

Қазір аграрлық секторда шаруа қожалықтары ҚҚС төлемейтіні, ал заңды тұлғалар қолда бар жеңілдіктерге байланысты бюджетке төлеуге тиісті салықтардың тек 30%-ын төлейтіні атап өтілді. Жаңа тетіктер бойынша олардың ешқайсысы ҚҚС төлемейді. Бұл қазақстандық ауыл шаруашылығы өнімдерін (картоп, қызанақ, пияз және басқалары) бәсекеге қабілетті етуге мүмкіндік береді. 10% мөлшерлеме қолданылатын салалардың түрлері бизнес өкілдерімен әлі де талқыланып жатыр.

Еске салсақ, бұған дейін үкімет қосылған құн салығын 20%-ға дейін көтеруді ұсынған еді. Президент Қасым-Жомарт Тоқаев отандық бизнес өкілдерімен кездесуде ұсынылған мөлшерлеме тым жоғары екенін айтып, үкіметке қосымша құн салығы мәселесін тағы да пысықтауды тапсырды.