Тоқаев жазушы Мұхтар Мағауиннің отбасы мен жақындарына көңіл айтты

Президент Қасым-Жомарт Тоқаев аса көрнекті жазушы, мемлекеттік сыйлықтың лауреаты Мұхтар Мағауиннің дүниеден өтуіне байланысты оның отбасы мен жақындарына көңіл айтты. Бұл туралы Stan.kz ақпарат агенттігі хабарлайды. 

Тоқаев Мағауиннің қазасына көңіл білдірді.

“Мұхтар Мұқанұлы ғибратты ғұмырын киелі сөз өнеріне арнаған, ұлттық әдебиетіміз бен тарихымыздың көкжиегін кеңейтуге елеулі үлес қосқан заңғар тұлға еді. Төл руханиятымыздың төрге озуына, ұлт тарихнамасының тасқа басылуына өзінің алға қойған асыл мұратымен, қайтпас қажыр-қайратымен қалтқысыз еңбек сіңірді. Халық жазушысының қуатты қаламынан туған шығармалары, тарихи еңбектері, естелік-эсселері қалың оқырманның жүрегінен өз орнын тапты. Соңына бай әдеби мұра қалдырып, өнегелі өмір сүрген Мұхтар Мұқанұлының қайталанбас есімі халқымыздың жадында сақталады. Марқұмның иманы саламат, жаны жәннатта болсын”, – делінген жеделхатта.

Еске салсақ, жазушы Мұхтар Мағауиннің өмірден озғанын хабарлаған едік.