ШҚО-да қызын ернінен сүйген әкенің әрекетінен полиция қылмыс белгілерін таппады
Қазақстанда 12 жастағы қызын ернінен сүйген әкеге қатысты полиция тексеруді аяқтады. Ер адамның әрекетінен қылмыс құрамы анықталмағандықтан, іс материалын есептен шығару туралы шешім қабылданған. Бұл туралы Stan.kz ақпарат агенттігі хабарлайды.
Қараша айының басында әлеуметтік желілерде әкенің 12 жастағы қызын ернінен сүйіп жатқан видеосынан кейін құқық қорғаушы Ләззат Рақышева полицияға және Бала құқықтары жөніндегі уәкілге шағым түсірген болатын.
Шығыс Қазақстан облысының полициясы шағымды тіркеп, тексеру бастаған. Оған жергілікті білім бөлімі мен әкімдік өкілдері де қатысқан. Ішкі істер министрлігі Ювеналды полиция басқармасының басшысы Асхат Дүйсембековтің айтуынша, қазыр тексеру аяқталған. Полиция ер адамның әрекетінен қылмыс белгілерін анықтамағандықтан, тексеру материалын есептен шығару туралы шешім қабылдаған. Алайда Асхат Дүйсембеков тексеру барысында қандай сараптамалар жүргізілгенін және кімдерден жауап алынғанын нақтыламады.

Оқу-ағарту министрі Жұлдыз Сүлейменова пікір білдіріп, мұндай жағдайлардың алдын алуда балаларға жеке шекарасын түсіндіру маңызды екенін алға тартты. Оның сөзінше, биыл мектеп бағдарламасына "Жеке қауіпсіздік" атты жаңа курс қосылған. Жетінші сыныптан бастап оқушыларға бұл тақырып бойынша арнайы сабақтар өткізіледі.
"Меніңше, мұндай қарым-қатынас түріне жол беруге болмайды. Сондықтан биыл “Жеке қауіпсіздік” курсын енгіздік. Әр бала өз шекарасын қорғай білуі керек. Сондай-ақ ненің дұрыс, ненің бұрыс екенін түсінгені маңызды", – деді министр.
Еске салсақ, бұған дейін Өскеменде 12 жастағы қызын ернінен сүйген әкенің видеосы дау тудырған еді. Мұнда әкесі туған күнімен құттықтап, ернінен ұзақ сүйген. Кейін полиция тексеру бастады.