Қарағандылық мастықтан айықтыратын орталыққа түсіп, көз жұмған: Анасы оның уланып өлгеніне сенбейді
Қарағандыда мас күйінде ұсталып, айықтыратын орынға қамамақ болған 27 жастағы ер адам кейін жедел- жәрдем көлігінде көз жұмды. Анасы ұлының мастықтан өлгеніне сенбейді. Айтуынша оның денесінде, бетінде көгерген соққы іздері болған. Бұл туралы Stan.kz ақпарат агенттігі хабарлайды.
Фото марқұмның жақындарынан
27 жастағы Павел Скрипкарашты 29 қыркүйекте полиция қызметкерлері ұстап айықтыру үшін қамауға алған. Полицияның айтуынша ол қаланың орталық көшелерінің бірінде агрессивті күйде ұсталған. Облыстық полиция департаментінің баспасөз қызметінің хабарлауынша, ер адам өтіп бара жатқан адамдарға тиісіп, басқа адамдардың көліктеріне зақым келтіруге тырысқан.
"Куәгерлердің айтуынша, автопатруль келгенге дейін ер адам өтіп бара жатқан адамдарға агрессивті әрекет еткен. Оқиғаның бейнежазбасы бар. Куәгерлер төбелес туралы ақпаратты жоққа шығарады. Оны патрульдік экипаж мас күйінде уақытша бейімдеу және детоксикация орталығына жеткізді (TSWAD-Prim.). Орталыққа келгеннен кейін медицина қызметкерлері ер адамның комаға түскенін анықтап, жедел жәрдем бригадасын дереу шақырды. Жедел әрекет еткеніне қарамастан, ер адам жедел жәрдем көлігінде көз жұмды",-деп хабарлады Қарағанды облысы полиция департаменті.
Сондай-ақ, ведомство сараптама өлімнің себебін анықтағанын айтты. Олардың мәліметтері бойынша, ер адам улы затпен, (есірткі болуы мүмкін) жедел уланудан көз жұмған.
“Өлім фактісі полицияда тіркеліп, бұл жағдайда сараптама тағайындалды. Оқиғаның барлық мән-жайларын анықтау үшін тергеу амалдары жүргізілуде”, – деп атап өтті аймақ полициясы.
Марқұмның анасы Ольга Скрипкараш тергеудің ресми нұсқасына сенбейді. Ол ұлын көшеде белгісіз адамдардың ұрып-соққанына сенімді.
"Менің ұлым көшеде түрлі роликтер түсіргенді ұнататын. Ол көпшіліктің назарын жақсы көретін. Сол күні ол пранк түсірген. Тіпті бұл туралы біздің танысымызға да айтқан. Мүмкін, сондай видео түсіріп жүріп, біреу оны түсінбей ұрып тастаған шығар. Бізге оның денесі берілгенде, сол жақ дене бөлігінде, бетінде гематома болды. Мен оны доғал затпен ұрып-соққанына немесе асфальтқа басын қатты ұрғанына сенімдімін. Дәл осылай уланудан көз жұмуы мүмкін емес. Ия, ол кейде мереке күндері ішетін. Бірақ оның бұдан өліп кетуі мүмкін емес", - дейді Ольга Скрипкараш.
Марқұмның анасы ұлының қайтыс болу себебін егжей-тегжейлі білуге ниетті. Оның артында жұбайы мен бір жарым жасар баласы қалған.