Шығыс Қазақстан облысында жетімдерге арналған мектеп-интернат директоры ақша ұрлағаны үшін 4 жылға сотталды

Қаржылық мониторинг агенттігі 12 миллион теңге бюджет қаражатын ұрлау фактісі бойынша ШҚО жетім балаларға арналған мектеп-интернатының директоры А.Базархановаға қатысты қылмыстық істің тергеуі аяқталғанын мәлімдеді, деп хабарлайды Stan.kz ақпарат агенттігі.  

А.Базарханова 2013 – 2019 жылдар аралығында емдік дене шынықтыруға бөлінген ақша қаражатын ұрлағап, сабақ өткізбестен, оқу сағаттарын жүргізгені үшін ақы алып отырған. 

“Бұдан басқа, А.Базарханова интернат қызметкерлеріне қосымша жұмыс істегендері үшін ақы аударып отырған, кейіннен олар ол ақшаларды есеп шоттарынан шешіп, Базархановаға қайтарып беріп отырған. Шын мәнінде қызметкерлер қосымша жұмыс атқармаған”, – делінген хабарламада. 

Сонымен қатар А.Базарханова өзінің танысына қарызды қайтару мақсатында оның жұбайын жұмысқа алып, 729 мың теңге еңбекақы төлеп, бюджет қаражатын талан таражға салған.

“Облыстық сотының қылмыстық істер бойынша сот алқасы оның өз кінәсін мойындап, шығынды толықтай қайтарғанын, жасөспірім баласының бар екенін ескере отырып, А.Базархановаға 4 жыл бас бостандығынан айыру жазасын тағайындады”, – деп қосты агенттік өкілдері.