Қазақстандық шенеунік мемлекеттік қызметкерлердің жалақысы мен үстемақысын арттыруды ұсынды
Қарағанды облысы әкімінің орынбасары Ермек Алпысов мемлекеттік қызметкерлердің жалақысы мен үстемақысын көбейтуді ұсынды. Бұл туралы Stan.kz ақпарат агенттігі хабарлайды.
Алпысовтың айтуынша, әкімдіктер мен тексеру комиссияларының мемлекеттік қызметкерлерінің жекелеген санаттарының төмен жалақы алуы – маңызды мәселелердің бірі.
"Статистикаға сәйкес, Қарағанды облысында 2023 жылға арналған орташа айлық жалақы 367 мың теңге, ал Қазақстанда 394 мың теңге. Бұл ретте облысымыздағы ірі кәсіпорындарда жақсы мамандар 800 мыңнан 1 миллион теңгеге дейін жалақы ала алады. Бас маманның лауазымдық жалақысы А деңгейлі ауданда еңбек өтіліне байланысты ең көп дегенде 260 мың теңге болды. Облыстық деңгейде – 302 мың теңге. Қызметкерлердің лауазымдық жалақысы кейінгі рет 2021 жылдың 1 шілдесінде көтерілген", – деді шенеунік.
Осыған байланысты Қарағанды облысы әкімінің орынбасары мемлекеттік қызметкерлердің жалақысын 394 мың теңгеге дейін көтеруді ұсынды.
"Қазір мемлекеттік қызметте кадрлардың ауысуы жиі кездесетін жағдай. Адамдар тәжірибе жинақтап, жалақысы жоғары жұмысқа кетіп жатыр. Сондай-ақ мемлекеттік қызметкерлердің қызметін бағалау нәтижелері бойынша үстемақылардың санын екіден төрт жалақыға дейін арттыруды ұсынамыз", – деді Алпысов.
Айта кетейік, бұған дейін Қазақстанда қандай мамандық иелеріне 1 млн теңге жалақы төленетіні туралы жазған едік.