Шаңғышыны марапаттау рәсімі гендерлік дауға ұласты
Неміс спортшысы Селина Фрайтаг трамплиннен секіру турнирінде жеңіске жеткені үшін жүлде ретінде жеке гигиеналық құралдар жиынтығын алғанын айтып, наразылығын білдірді. Бұл туралы Stan.kz ақпарат агенттігі хабарлайды.
Фото: Global Look Press
2024 жылдың 30 желтоқсанында Германияның Гармиш-Партенкирхен қаласында Two Nights Tour турнирінің іріктеу кезеңі өтті. Әйелдер санатында неміс секірушісі Селина Фрайтаг жеңіске жеткенімен оған берілген жүлде спортшыны ашуландырды. Жеңіске жеткені үшін оған жеке гигиеналық құралдар жиынтығы табысталған. Ал ерлер арасында жеңімпаздарға 3 200 еуро (1 763 000 теңге) көлемінде ақшалай сыйақы берілді.
"Ерлер турнирінде іріктеу кезеңіндегі жеңіс үшін 3 200 еуро беріледі. Ал маған сүлгілер, душқа арналған гель және сусабын салынған пакет ұсынылды. Мен көп шағымданғым келмейді. Бірақ бұл жерде айырмашылық анық көрініп тұр," – деді Селина.
Ерлер санатындағы іріктеу кезеңінің жеңімпазы – 2022 жылы Бейжіңде (Қытай) өткен Олимпиада ойындарының чемпионы, аустриялық Ян Херль.
23 жастағы Селина Фрайтаг – 2023 жылы Планицада (Словения) өткен әлем чемпионатының екі дүркін жеңімпазы, 2023 жылы Краковта (Польша) өткен Еуропа ойындарының қола жүлдегері, сондай-ақ 2022 жылғы қысқы Олимпиада ойындарының қатысушысы. Олимпиадада аралас командалық турнирде Германия құрамасы тоғызыншы орынға ие болды, ал Селина жеке жарыста 22-орын алды.
Еске салайық, бұған дейін Абай облысы Жарма ауданы атынан шыққан Пара-армрестлингтен жеті дүркін әлем чемпионы Зарина Примакқа жергілікті билік бокал жинағын сыйлаған. Өңірге қарасты Шар қаласы "Жастар ресурстық" орталығының директоры Рауан Кәкімжанұлы спортшыға тарту ететін басқа "жөні дұрыс" сыйлық болмағанын алға тартты. Алайда шенеуніктердің сыйлығы қазақстандықтардың ашуын туғызды.
