Шетелдегі сайлау учаскелері жұмысын аяқтады
Қазақстан азаматтары 61 елде дауыс берді. Шетелдегі 79 сайлау учаскесінің барлығы жұмысын аяқтап, жалпы 9623 қазақстандық өз таңдауын жасады. Бұл туралы Stan.kz ақпарат агенттігі хабарлайды.
Сыртқы істер министрлігінің мәліметінше, шетелдегі барлық 79 учаскелік сайлау комиссиясы өз жұмысын аяқтады.
Қазақстан азаматтары 61 елде дауыс берді.
Жалпы дауыс бергендердің саны 9623 адамды құрады. Бұл шетелдегі сайлаушылардың 84,8%-ының қатысуын қамтамасыз етті.
Астана уақытымен 24 тамыз сағат 00:00-ге дейін 74 сайлау учаскесі жұмысын аяқтаған. Шетелдегі дауыс беру үдерісі Қазақстан Республикасының Сан-Францискодағы Бас консулдығы жанындағы сайлау учаскесінде Астана уақытымен 24 тамыз күні сағат 08:00-де толық аяқталды.
Ал Қазақстанда 23 тамыз күні сағат 20:00-дегі жағдай бойынша 9 352 151 сайлаушы бюллетень алды. Бұл сайлаушылар тізіміне енгізілген азаматтардың 74,19%-ына тең.
Еске салайық, бұған дейін Құрылтай депутаттарын сайлау 23 тамызда өтті. Дауыс беру аяқталған соң бірден бірнеше зерттеу ұйымының exit-poll нәтижелері жарияланды. Үш сауалнаманың қорытындысы да бірдей тенденцияны көрсетті: "Әділет" партиясы айқын басымдықпен алда, ал тағы төрт партия 5 пайыздық межеден асып, Құрылтай құрамына өтуі мүмкін. Атап айтқанда, "Ауыл", Respublica, "Ақ жол" және Жалпыұлттық социал-демократиялық партиясы барлық үш exit-poll нәтижесінде де өту шегінен жоғары көрсеткішке ие болды. Ал Қазақстан халық партиясы мен "Байтақ" партиясының көрсеткіштері 5 пайызға жеткен жоқ.
