Қазақстанға популяцияны қалпына келтіру үшін жаңа жолбарыстар әкелінеді
Экология және табиғи ресурстар министрі елде Тұран жолбарысын қалпына келтіру бағдарламасы жалғасып жатқанын айтты. Оның сөзінше, жеткізілген жолбарыстар жұбынан төл алу әрекеті сәтсіз аяқталғанына қарамастан, жұмыс тоқтаған жоқ. Бұл туралы Stan.kz ақпарат агенттігі хабарлайды.
Министрдің айтуынша, жеткізілген жолбарыстар өзін жақсы сезінеді және вольерде ұстау жағдайына бейімделген. Өткен жылы 23 желтоқсанда жануарлар шағылысқанымен, ол нәтиже бермеген.
“Алайда жақында, жыл басында бұл процесс қайта тіркелді. Осы жолы біз бұл жұптан төл аламыз деп үміттенеміз”, – деді Нысанбаев.
Министрдің сөзінше, Қазақстан реинтродукция бағдарламасы аясында жолбарыстар санын көбейтуді жоспарлап отыр. Сәуір–мамыр айларында елге Ресейден тағы төрт жолбарыс әкелінеді.
“Оларды мүмкін сәуірдің соңы мен мамырдың басында жеткіземіз. Осылайша алты жолбарыспен Тұран жолбарысының популяциясын қайта қалпына келтіру жұмысына кірісеміз”, – деді ведомство басшысы.
2024 жылдың күзінде Қазақстанға екі амур жолбарысы Богдан мен Кума Нидерландтағы жыртқыш жануарларды күтіп-бағуға арналған Stichting Leeuw ("Қасиетті арыстан") мамандандырылған орталығынан әкелінді. Олар Иле-Балхаш мемлекеттік табиғи резерваты аумағына орналастырылды. Орталық Landgoed Hoenderdaell Zoo зообағының жанында орналасқан.
Бұл оқиға Қазақстанда жолбарысты қайта жерсіндіру бағдарламасы аясындағы жоспарлы жұмыс пен халықаралық ынтымақтастықтың нәтижесі екені айтылды. Бағдарлама 2010 жылы жолбарысты сақтау мәселелеріне арналған алғашқы халықаралық форум өткеннен кейін басталған. Сол кезде жолбарыс мекендейтін барлық елдер жабайы табиғаттағы жолбарыстар санын екі есе арттыруға келіскен.
Айта кетейік, бұған дейін Қазақстанға шетелден әкелінген жолбарыстардың видеосы тараған еді. Кейін Экология министрлігі тұран жолбарысын көбейту үшін 1 миллиард теңгеден астам қаржы сұраған еді.
