Қорғаста шекарадан өту уақыты 15 секундқа дейін қысқармақ

Қазақстан мен Қытай шекарасындағы "Қорғас" халықаралық шекара маңы ынтымақтастығы орталығында жолаушыларды биометриялық тексеретін Q-Gate электронды жүйесі енгізіліп жатыр. Ол адамның жеке басын бет-әлпеті мен паспорты арқылы 15–50 секунд ішінде анықтайды. Жаңа жүйе дәстүрлі паспорттық бақылаудан 4-5 есе жылдам жұмыс істейді. Бұл туралы Stan.kz хабарлайды.

Жаңа жүйе қалай жұмыс істейді?

Q-Gate жүйесі жолаушының бет-әлпетін және паспортын тексеріп, жеке басын автоматты түрде анықтайды. Соның арқасында шекаралық бақылаудан өтетін адамдар санын көбейтіп, кезекті азайтуға мүмкіндік бар.

Оқыңыз

Қорғас шекара аймағында қарулы қақтығыс болды Оқыңыз

Мысалы, жүйе арқылы 200 жолаушыны тексеруге шамамен 7 минут қажет. Ал қызметкерлер құжаттарды қолмен тексергенде бұл жұмысқа шамамен 30 минут кетеді.

Қазір Қазақстанның 11 өткізу бекетінде 54 Q-Gate биометриялық терминалы жұмыс істейді. Олардың қатарында Астана мен Алматы қалаларының халықаралық әуежайлары бар.

2028 жылға дейін елдің өткізу бекеттеріне осындай тағы 198 терминал орнату жоспарланған.

Қорғасқа жыл сайын 2 миллионға жуық адам барады

Жаңа жүйенің енгізілуі "Қорғас" орталығы үшін маңызды. Жетісу облысының туризм басқармасының бас маманы Мұрат Мәдіевтің айтуынша, былтыр орталыққа шамамен 2 миллион адам барған. Ал билет сатудан түскен табыс 3 миллиард теңгеден асқан.

"Қорғас" – Жетісу облысындағы танымал туристік орындардың бірі. Өңірге келген туристер Алакөл мен Балқаш көлдеріне, "Алтын-Емел" ұлттық паркіне және шекара маңы ынтымақтастығы орталығына барады.

Орталықта сауда жасаудан бөлек, туристер Қытай мәдени орталығының музейін аралап, 9D кинотеатрға және саябаққа бара алады. Қазір мұнда туристерге арналған 50-ге жуық жаңа жоба іске қосылған.

Айта кетейік, бұған дейін 2027 жылдан бастап Қазақстанға шетел азаматтарының кіру тәртібіне жаңа талаптар енгізілетіні туралы жазған едік.