Қазақстандықтар бірыңғай уақыт белдеуінің денсаулыққа әсерін зерттеуді талап етіп, петиция бастады
Қазақстанда уақытты бірыңғай сағат белдеуіне ауыстырудың кері әсерін зерттеуге ел тұрғындарын қосуды талап еткен жаңа петиция жарияланды. Бұл туралы Stan.kz ақпарат агенттігі хабарлайды.
Петиция авторлары Қазақстанда уақытты бірыңғай сағат белдеуіне ауыстырудың денсаулыққа тигізетін кері әсеріне зерттеу жүргізуді талап еткен. Олардың айтуынша, мұндай зерттеу Сауда және интеграция министрі Арман Шаққалиевтің мәлімдемесіне сәйкес, үш жыл бойы жүргізілуі керек болған.
Авторлар зерттеу үшін арнайы ресурс – сайт, байланыс орталығы, дауыс беру жүйесі немесе азаматтарды қабылдау кабинетін құруды ұсынған.
"Себебі емханалардағы дәрігерлерге немесе жергілікті стационарлық қызметтерге жүгінген кезде, дәрігерлер денсаулық жағдайының нашарлауына себеп ретінде “уақыт” немесе “сағат белдеуі” дегенді көрсете алмайды. Оның орнына басқа медициналық себептер жазылады", – делінген петицияда.
Сондай-ақ петиция авторлары қол қойған азаматтарды зерттеуге міндетті түрде қосуды талап еткен.
Олардың пікірінше, бұл зерттеуде қазақстандықтардың бірыңғай сағат белдеуіне қатысты нақты пікірі мен көзқарасын көрсетуге мүмкіндік береді. Петиция Қазақстанның денсаулық сақтау министрлігіне жолданған.
Бұған қоса, авторлар зерттеуге бюджет қаражатын үнемдемей, оны Ғылым және жоғары білім министрлігі бастапқыда жоспарлағандай жүргізуді талап етті.
"Бұл зерттеудің нәтижелерін жария түрде, мүмкіндігінше күн сайын көрсетуді және әр азаматтың өз пікірін тексеруіне мүмкіндік беруді талап етеміз. Себебі уақытты ауыстыруға және бірыңғай сағат белдеуін енгізуге негіз болған зерттеу жарияланбаған, күмәнді және нақты негізге сүйенбейді. Сондай-ақ халық арасында алдын ала сауалнама жүргізілген жоқ", – делінген петицияда.
Петицияға қол қойған азаматтар зерттеуге қатысуға және зерттеу жүргізетін мамандардың өздерімен байланысуына келісім берген.
Еске салайық, Қазақстанда да 2024 жылдың 1 наурызынан бастап бірыңғай UTC+5 уақыт белдеуіне өтті. Бұған дейін елде екі белдеу болған, UTC+5 және UTC+6. Қаңтар айында журналистер Шаққалиевтен “Егер ғалымдар Қазақстандағы біртұтас уақыт белдеуіне өту халыққа теріс әсер етеді деп айтса, министр өзінің қатесін мойындай ма?” деп сұраған еді. Сол кезде министр "бұл шешім қате болды деп ешқашан айтпаймын" деп мәлімдеді. Дегенмен Шығыс Қазақстан облысы әкімінің айтуынша, тұрғындардың уақытты ауыстыруға байланысты шағымдары өткен жылдың желтоқсан айында айтылған. Халық аймақта ерте қараңғы болып кететінін айтып шағымданған. Биыл наурыз айында облыстағы барлық аудандар өз жұмыс кестесіне, сағат 08:00-ден 17:30-ға дейін көшкені хабарланды. Яғни аймақ жаңа уақыт белдеуіне бейімделді.
