Павлодарда 11 жасар бала құтырған иттен қарындасын құтқарып қалды
Павлодарда мектеп оқушыларына көршісінің иті шабуыл жасап, олардың біреуін тістеп алды, деп хабарлайды Stan.kz ақпарат агенттігі Павлодар облысы полиция департаментінің баспасөз қызметіне сілтеме жасап.
Оқиға Павлодардағы Лесозавод көшесінде болған. 11 жасар ер бала мен 7 жастағы қарындасы мектепке бара жатқанда кенеттен көршісінің иті шабуыл жасаған.
Бала бірден қарындасын қорғап, оны өз денесімен жабады. Құтырған ит ұл баланы тіптеп алған. Оқушылар бірден үйге жүгіріп, болған жағдайды ата-анасына хабарлайды. Олар полиция мен жедел жәрдем шақырды.
Оқиға орнына келген тәртіп сақшылары иттің иесін анықтады. Ол үй жануарын байлап қоюға міндеттелді.
- Қазақстандықтар үй жануарларын өз қаражаты есебінен міндетті есепке тұрғызуы керек
- Шығыс Қазақстан облысында аю бүтін бір қаланы үрейде ұстап отыр
Бұдан басқа, иттің иесі Қазақстан Республикасының Әкімшілік құқық бұзушылық туралы Кодексінің 408-бабы 2-бөлігі (жеке тұлғалардың денсаулығына немесе мүлкіне зиян келтіруге әкеп соққан иттерді ұстау және серуендету қағидаларын бұзу) бойынша әкімшілік жауапкершілікке тартылды. Тәртіп бұзушыға 10 АЕК (29 170 теңге немесе 68 АҚШ доллары) мөлшерінде айыппұл салынды.
Шабуыл фактісі туралы Павлодар қаласының ветеринарлық қызметі де хабардар етілді. Бала медициналық көмек көрсетілгеннен кейін үйіне жіберілді, деп хабарлады полиция департаменті.