Назарбаевтың еңбегіне лайықты, әділетті баға беруіміз керек – Тоқаев

Президент Қасым-Жомарт Тоқаев Астананың бауырлас қалалары форумында елорданы көшіру геосаяси тұрғыдан өте дұрыс қадам болғанын, сондықтан бәріміз Нұрсұлтан Назарбаевтың еңбегіне лайықты, әділетті баға беруіміз керек екенін айтты. Бұл туралы Stan.kz ақпарат агенттігі хабарлайды. 

Президент бас қаламыз ресми түрде 1997 жылы 10 желтоқсанда көшірілгенін еске салды. 

"Ал осыдан 25 жыл бұрын 6 мамырда Ақмола атауы Астана болып өзгертілді. Елорданың жылнамасы Тәуелсіз Қазақстанның шежіресімен тығыз астасып жатыр. Шын мәнінде, астананы көшіру геосаяси тұрғыдан өте дұрыс қадам болды. Бұл – халқымыздың болашақ тағдырын айқындаған аса маңызды және дер кезінде қабылданған тарихи шешім. Тұңғыш Президенттің осы бастамасы жаңа ұлттық идеяға айналды. Бұл шешім еліміздің, халқымыздың ұлттық мүддесіне сай келгеніне ешқандай күмән жоқ. Сондықтан бәріміз Нұрсұлтан Әбішұлы Назарбаевтың бұл саладағы еңбегіне лайықты, әділетті баға беруіміз керек. Әділетті Қазақстанда ақты ақ, қараны қара деу қажет, басқа сөзбен айтқанда, ненің шындық, ненің өтірік екенін ажырата білу керек. Бұл – еліміздің болашағына тікелей қатысы бар мәселе", - деді Мемлекет басшысы.

• Назарбаевтың туған күнінде отшашу шашылмайды: Әкім экс-президенттің аты-жөнін атаудан бас тартты


• Сенат Нұрсұлтан Назарбаевты тағы бір мәртебесінен айыратын заңды мақұлдады

Қасым-Жомарт Тоқаев елорданың заманауи келбетін қалыптастыруға Кисё Курокава, Норман Фостер, Ренато Аркетти, Манфреди Николетти сияқты әлемге әйгілі сәулетшілер атсалысқанын атап өтті.

"Бәйтерек" монументі, "Бейбітшілік және келісім" сарайы, "Хан шатыр" кешені және басқа да бірегей нысандар қаланың көркін аша түсті. Бас қаламыз "Астана опера", "Астана балет" сияқты өнер ордалары арқылы бүкіл әлемге мәдени орталық ретінде танылды. Жаңа елорда Тәуелсіз Қазақстанның өркендеуіне тың серпін берді", - деді президент.