Соғыстан қашқан ресейлік әскери қызметкер Атыраудан табылды: Сот оны елден шығармақ

Донецкідегі әскери бөлімнен қашқан ресейлік сарбаз шекараны жаяу заңсыз кесіп өтіп, бір жылдан астам уақыт бойы Атырауда жүрген. 36 жастағы Александр Чабыевті полиция биыл маусымда анықтаған. Енді ол бес жылға Қазақстаннан шығарылмақ. Бұл туралы Stan.kz ақпарат агенттігі хабарлайды. 

Якутияның 36 жастағы тумасы Александр Чабыев 2025 жылы мамырда Донецкідегі әскери бөлімнен қашып кеткен. Ол Волгоградқа автостоппен жетіп, кейін Қазақстан шекарасын жаяу әрі заңсыз кесіп өткен. Арада бір жылдан астам уақыт өткен соң оны Атыраудан тапқан.

Бірнеше жыл бұрын Александр Чабыев Якутияда туристік бизнеспен айналысып, өз компаниясын басқарған. Ал 2025 жылдың көктемінде ол Ресей әскерінде қызмет етіп, Донецктегі соғыс қимылдары жүріп жатқан аймақта болған. Сол жылдың мамырында әскери бөлімінен кетуге шешім қабылдаған.

Чабыев Волгоградқа дейін автостоппен жетіп, кейін Қазақстан бағытына бет алған. Ол Батыс Қазақстан облысының Жәнібек ауданы маңында өткізу бекетінен тыс жерде жаяу кесіп өткен. Оның маршруты бойынша белгілі болған келесі нүкте — Атырау болған. Мұнда оны 2026 жылы 17 маусымда экстремизмге қарсы іс-қимыл басқармасының қызметкерлері ұстаған.

"Бүркіт" базасы арқылы жүргізілген тексеріс кезінде Чабыевтың Қазақстанға ресми түрде ешқашан кірмегені анықталған.

Halyqstan мәліметінше, Чабыев №35390 әскери бөлімінде — Шығыс әскери округінің 68-әскер корпусы құрамындағы 39-шы жеке гвардиялық мотоатқыштар бригадасында қызмет еткен. Бригаданың тұрақты орналасқан жері — Сахалин облысы.

Чабыев әскери бөлімін өз бетімен тастап кеткен жалғыз әскери қызметкер емес. Ресей әскери қызметкерлері туралы ақпарат жинайтын "НЕ ЖДИ хорошие новости" жобасы осы бригададан қызмет орнын өз еркімен тастап кеткен сарбаздардың тізімін жариялаған.

Жоба мәліметінше, әр кезеңде мұндай тізімге 917 әскери қызметкер енген. Авторлардың айтуынша, олардың 217-сі 2024 жылы, ал 617-сі 2025 жылы әскери бөлімінен өз еркімен кеткен. Бұл тізімде Александр Чабыевтың да аты-жөні бар.

Ресей азаматының шекараны заңсыз кесіп өтуіне қатысты іс Атырау қаласының №2 сотына жеткен кезде, Ресейдің әскери тергеу органдары оған халықаралық іздеу жариялағаны белгілі болды.

Чабыев сотта шекараны заңсыз кесіп өткенін мойындады. Ол қашып кетуіне әскери қызметті жалғастырғысы келмегені және өз өмірі үшін қауіптенуі себеп болғанын айтты. 

Оның айтуынша, Ресейде оны соғыс қимылдарына қатысудан жалтарғаны үшін қудалап жатыр.

Сот отырысында Чабыев екі өтініш білдірген. Ол өзіне рақымшылық жасауды және мүмкін болса, Қазақстаннан шығармауды сұраған.

Атырау қаласының №2 соты Чабыевты бір жылға бас бостандығынан айыруға үкім шығарған. Алайда сот оны бірден рақымшылық туралы заң негізінде жазадан босатқан.

Сонымен бірге оның Қазақстанда қалуына рұқсат берілмеді. Ресей азаматына бес жыл мерзімге Қазақстан аумағынан шығару түріндегі жаза тағайындалды.

Үкімнің бұл бөлігін орындау Ұлттық қауіпсіздік комитеті Шекара қызметі мен полицияға жүктелді.