Ақтөбеде мас болып көлік жүргізген экс-депутатқа қатысты сот үкім шығарды
Ақтөбе мәслихатының бұрынғы депутаты Сәния Мұратоваға қатысты іс бойынша сот шешім шығарды. Бұл туралы Stan.kz ақпарат агенттігі хабарлайды.
Фото: saniya_bulqairqyzy Instagram парақшасынан
Әкімшілік сот үш рет шақыру қағазын жібергенімен, Сәния Мұратова сот отырысына ешқашан қатыспаған. Мас күйінде көлік жүргізгені үшін сот оны 15 тәулікке қамауға алуды және жеті жыл мерзімге жүргізуші куәлігінен айыруды ұйғарды. Сотта полиция инспекторы Нұржас Мүсіреп бір ай бойы полиция экс-депутаттың қайда жүргенін анықтай алмағанын айтты. Сондықтан істі қарап жатқан судья 53 жастағы Мұратованың қатысуынсыз шешімді оқыды.
"Сот қаулысымен Мұратова ҚР Әкімшілік құқық бұзушылық кодексінің 608-бабының 1-бөлігінде көзделген әкімшілік құқық бұзушылықты жасағаны үшін кінәлі деп танылды. Оған 15 тәулікке әкімшілік қамауға алу түріндегі жаза тағайындалып, 7 жыл мерзімге көлік жүргізуші куәлігінен айырылды", – деп хабарлады ведомство.
Еске сала кетейік, бұған дейін осы жылдың қыркүйек айында депутат Мұратованың жол қозғалысы ережесін екі рет бұзғаны хабарланған болатын. Бірінші жағдайда ол көлікті жүргізіп келе жатып, қос тұтас сызықты кесіп өткен. Бір аптадан кейін, 20 қыркүйекте, депутаттың көлікті мас күйінде басқарғаны жазылған.