Қазақстанның жол саласында миллиардтаған заң бұзушылықтар бойынша ондаған қылмыстық іс қозғалған
Қазақстанның жол саласында миллиардтаған заң бұзушылықтар бойынша ондаған қылмыстық іс қозғалған деп хабарлайды Stan.kz ақпарат агенттігі. Бұл жөнінде бас прокуратураның баспасөз қызметі мәлімдеді.
"Мемлекет басшысының тапсырмасын іске асыру шеңберінде прокуратура органдары көлік жолдары саласының жай-күйін тексерудің қорытындысын шығарды. Бұған дейін баспасөзде көлік жолдарын салу және жөндеу кезінде жымқыру және сыбайлас жемқорлықтың көптеген фактілері анықталғандығы туралы хабарланды. Құқық бұзушылықтар бюджет қаражатын заңсыз шығару схемаларында көбінесе бір мердігер ұйымдары болған. Атап айтқанда, осындай фирмалардың бірінің өкілдері Ақмола өңірінің Қоянды кентінде 907 млн теңгеге күрделі жөндеу және жергілікті жол құрылысын жасамағандығы белгілі болды. Бүгінгі күні шарт бұзылды, өңірдегі прокурорлар сотқа дейінгі тергеп-тексеруге бастамашылық жасап, оның шеңберінде қылмыстық құқық бұзушылық жасаудың мән-жайлары анықталуда", - делінген сәрсенбіде тараған ақпаратта.
Ақпаратқа сүйенсек, Солтүстік Қазақстан облысында облыстық жолдарды жөндеуге бөлінген 423 млн теңгені жымқырды деген айыппен Ғ. Мүсірепов атындағы аудан әкімдігінің және жергілікті мердігер мекеменің басшылары қамауға алынып, жауапқа тартылған.
"Жұмыстарды қабылдау туралы жалған актілер бойынша жолдың жоқтығына қарамастан, миллиондаған мемлекеттік қаржыны аударған", - деп қосты прокуратура.
- "Адам өмірінің кұны": Көкшетауда шенеуніктердің пандемия кезінде ИВЛ аппаратының орнына қымбат көлік сатып алғаны анықталды
- Алматы облысында дәріхана өкілдерінен пара алып, лицензия берген екі қызметкер ұсталды
- Шымкент қалалық білім басқармасының лауазымды тұлғасы парамен ұсталды
Мемлекеттік сатып алу кезінде өнім жеткізушілер таңдау кезеңі автожолдар саласындағы неғұрлым жемқорлықпен байланысты болып табылған.
"Мәселен, аудан прокурорларының араласуынан кейін Аршалы ауданы әкімдігінің Бөлім басшысы Екатеринбург-Алматы автобанынан Берсуат ауылына дейінгі учаскені күрделі жөндеу бойынша 1,1 млрд теңгеге заңсыз шарт жасасқаны үшін теріс себептермен жұмыстан босатылған болатын", - делінген мәліметте.
Прокурорлар бюджеттің негізсіз шығындарының жолын кесуге ерекше назар аударатыны атап өтіледі.
"Шығыс Қазақстан облысының Алтай ауданында жөнделген учаскеге 148 млн-нан астам бюджет қаражатын артық жұмсау фактісінің алдын алынды және басшылық буындағы кінәлі лауазымды тұлға лайықты тәртіптік жазаға тартылды", - дейді ведомство өкілдері.
Тексеру қорытындысы бойынша барлығы 300-ден астам заң бұзушылық анықталды, 30 млрд теңге сомасына бюджет шығындарының алдын алынды, мемлекет кірісіне 2,5 млрд теңге өтелді, 29 қылмыстық іс қозғалды, 305 адам тәртіптік және әкімшілік жауапкершілікке тартылғаны айтылады.
"Жолдардың қанағаттанарлықсыз жағдайына орынсыз жоспарлау, инновацияларды енжар енгізу, беріктігі жоғары материалдарға үнемдеу және т. б. ықпал етіп отыр. Осыған байланысты, Бас прокуратура Үкіметке қаралып жатқан шетелдік озық тәжірибеге негізделген көлік жолдары саласын түбегейлі өзгерту бойынша ұсыныстармен қадағалау актісін енгізді", - дейді бас прокуратура.
"Үш сағат істейтінді бізде он минутта бітіреді": Германиядағы қазақ дәрігері сүндеттеу ісінде Қазақстан қалай алға кеткенін айтып берді
