Қазақстандықтар екі ай ішінде өздері қалаған медициналық орталыққа тіркеле алады
Қазақстандықтар 15 қыркүйек пен 15 қараша аралығында емделетін медициналық орталығын ауыстыра алады. Бұл туралы Stan.kz ақпарат агенттігі хабарлайды.
Азаматтар медициналық-санитарлық көмек көрсететін 1935 ұйымның біріне тіркеле алады. Оның 710-ы мемлекеттік және 1225-сі – жекеменшік клиника.
Әлеуметтік медициналық сақтандыру қоры үйіне жақын маңдағы ауруханаларға тіркелуге кеңес береді. Таңдаған медициналық ұйым алғашқы медициналық-санитарлық көмек көрсетуге әлеуметтік медициналық сақтандыру қорымен шарт жасасқан болуы тиіс.
Мекемелердің тізімі fms.kz сайтында "Клиниканы таңдау" бөлімінде көрсетілген.
Жаңадан тіркелген емханадан 2024 жылдың 1 қаңтарынан бастап медициналық көмек алуға болады, яғни 31 желтоқсанға дейін бұрынғы емханасына барады.
“Емханаға тіркелу үшін egov.kz электронды үкімет веб-порталы арқылы "Бастапқы медициналық-санитарлық көмек көрсететін медицина ұйымдарына тіркеу" қызметін пайдалану керек. Сондай-ақ емхананың өзіне барып, өтініш жазуға болады”, – деп мәлімдеді әлеуметтік медициналық сақтандыру қорының баспасөз қызметі.
Шетелдік азаматтар алғашқы медициналық санитарлық және шұғыл стационарлық көмек алу үшін ерікті медициналық сақтандыру шарты немесе жүктелген медициналық сақтандыру шарты болуы тиіс.