Қазақстандық омбудсмен елімізде сотталғандарға арнайы білім квоталарын бөлуді ұсынды
Қазақстандағы адам құқықтары жөніндегі уәкіл Артур Ластаев Ғылым және жоғары білім министрілігінен сотталғандарға арнайы білім квоталарын бөлуді сұрады. Бұл туралы Stan.kz ақпарат агенттігі хабарлайды.
Фото iStock
Омбудсменнің айтуынша, осылайша сотталғандардың қылмысты қайта жасау мөлшері азаяды.
"Жоғары білім алу сотталғандарға босатылғаннан кейін өз мүмкіндіктерін іске асыруға мүмкіндік береді. Бұл мұндай жандарды қайта әлеуметтендіру бағыттарының бірі болып саналады. Осылайша қылмыстардың қайталану ықтималдығы да азаяды. Сонымен бірге мемлекеттің міндеті – сотталғандарды түзеу мекемесінен кейінгі өмірге дайындау", – деді Артур Ластаев.
Омбудсменнің айтуынша, биыл Алматы қаласы мен Алматы облысындағы екі мекеме базасында оқшаулау жағдайында жоғары білім алу бойынша пилоттық жоба іске асырылмақ. Алайда омбудсмен кеңсесінің мәліметінше, бакалавриат бағдарламалары бойынша оқу ақысының орташа құны жылына 1,1 миллион теңгеден асады екен.
“Бұл ретте көптеген сотталғандар келтірілген залалды өтей алмай жүріп, оқу ақысын өтеуге шамасы мүлдем келмейді. Сондықтан түзеу мекемелерінде жазасын өтеп жатқан адамдар үшін білім алуға квота бөлу үлкен қолдау болар еді”, – деп атап өтті омбудсмен хабарламасында.
Елімізде 14,618 сотталған адамның көбі – 15 пен 35 жас аралығындағы жастар.