Қазақстанда алдағы уақытта сегіз медициналық анықтама цифрлық форматқа ауыстырылады
Денсаулық сақтау вице-министрі Ербол Оспанов жалған анықтама сататын мекемелермен күрес жүргізу үшін елде сегіз анықтаманың цифрлық форматқа ауыстырылатынын айтты. Бұл туралы Stan.kz ақпарат агенттігі хабарлайды.
Фото: iStock
Орталық коммуникациялар қызметінде өткен брифинг барысында анықтамаларды цифрлық форматқа ауыстыру үшін келіссөздер жүріп жатқанын айтты.
“Қазір біз азаматтарға ең қажет деген сегіз анықтаманы белгіледік. Былтыр және биыл бірқатар анықтама цифрландырылды. Алайда мұнда да мәселелер бар. Анықтаманы цифрлық форматқа ауыстырғанымызбен, мұны талап еткен мемлекеттік орган немесе мекеме осы форматта қабылдауға дайын ба? Осыны ескере отырып, серіктестермен келіссөз жүргізіп жатырмыз. Мәселен, мамандандырылған ХҚКО, мейрамханалар, медициналық ұйымдар, білім беру саласындағы мекемелер бар”, – деді ол.
Вице-министрдің сөзінше, цифрлық форматқа ауысқан соң медициналық ұйымдар жалған анықтамалар жасай алмайды.
“Мұны мекеме кез келген уақытта тексере алады. Сондай-ақ азаматтың қатысуынсыз өздері-ақ базадан керекті анықтаманы алады. 2025 жылы бұл жоба толыққанды жүзеге асады. Ал жалған құжат жасаған мекемелер заң аясында жауап береді. Тіпті министрлік олармен келісмшарттарды бұзуы да мүмкін”, – деп қосты ол.
Министрлік дерегіне сәйкес келесі анықтамаларды 2025 жылдың 1 қаңтарынан бастап электронды форматта алуға болады:
Келесі медициналық анықтамалар электрондық форматқа көшіріледі:
- Еңбекке уақытша жарамсыздық парағы;
- 075 / е "Медициналық анықтама";
- 026 / е "ДКК қорытындысы";
- 073 / е "ТҚ басқаруға рұқсат туралы анықтама";
- 069 / е "Санаторийлік-курорттық карта";
- 052-2 / е "Баланың денсаулық паспорты";
- 076 / е "Қаруға рұқсат алу";
- 038 / е "Еңбекке уақытша жарамсыздық туралы анықтама".