"Бүгінгі Жолдаудың мән-маңызы айрықша. Оның арқалайтын жүгі 1 жылмен шектелмейді, ауқымы кең, мазмұны да бөлек. Біз алдымызға биік мақсаттар қойып отырмыз. Өздеріңізбен бірге Жаңа Қазақстанды құруға кірістік", - деді Президент.

Сондай-ақ Тоқаев қаңтардағы тәртіпсіздіктер туралы айта кетті.

“Осы ретте бүлікшілер қандай қадамға барды деген сұрақ туындайды. Жауабы айдан анық. Соңғы жылдары біз Қазақстанды түбегейлі жаңғыртуға, транформациялауға көштік. Түрлі салада ауқымды өзгерістер басталды. Бұл кейбір ықпалды адамдарға ұнамады. Олар жылдар бойғы заңсыз әрекеттерін одан әрі жалғастыра беруді көздеді. Неғұрлым жоғары билікке ие болуды көздеді. Сол үшін қандықол қылмыскерлер, қарулы бандалар мен опасыз шенеуніктер бірігіп астыртын топ құрды. Ішкі және сыртқы жауларымыз өзара бірігіп билікті басып алғысы келді. Президентті орнынан алғысы келді. Олар халықтың наразылық шеруін басқа арнаға бұрып, жұртты қасақана арандатты. Лаңкестер мемлекеттік органдарға, стратегиялық нысандар мен бизнеске тиесілі ғимараттарға шабуыл жасады. Билікке күйе жағу үшін бейбіт тұрғындарға оқ атты. Осының бәрін шетелдегі радикалды күштер өз мақсаттарына пайдаланды.Олар президентті биліктен кетіргісі келді”, – деді ол.

Оның айтуынша, Қастандық жасаушылардың арам пиғылдары іске аспады.

"Іштен шыққан жау жаман деген бар. Төңкеріс жасауға ұмтылғандардың арасында белгілі адамдар болды. Жоғары лауазым иелері мемлекетке сатқындық жасады. Олар күштік құрылымдардың заңға сәйкес қимылдауына кедергі келтірді. Мемлекет басшылығына қалалардағы ахуал туралы жалған ақпарат берді", -деді Президент.

Президент парызымыз - қанды қылмыс жасалғанын ұмытпай, барлық содырлар мен лаңкестерді жазаға тарту екенін айтты.

"Кешегі қатерлі күндерде Мемлекет басшысы ретінде халыққа арнап бірнеше үндеу жасадым. Барлық жағдайда азаматтарымызға жан-жақты түсіндіріп жеткіздім. Әрбір шешімді еліміздің мүддесіне сай қабылдадым. Бұл мен үшін бұлжымас ұстаным", - деді Тоқаев.

Мемлекет басшысы өкінішке қарай бүлікшілердің, қарақшылардың, лаңкестердің кесірінен қанша азаматымыз қаза болғанын жеткізді.

"Мен қара жамылған отбасылардың қайғысына ортақтасып, тағы да көңіл айтамын. Біз мұндай жағдай енді ешқашан қайталанбауы үшін бәрін жасаймыз. Қазақта "өткен күннен алыс жоқ, келер күннен жақын жоқ" деген сөз бар. Біздің парызымыз - қанды қылмыс жасалғанын ұмытпай, барлық содырлар мен лаңкестерді жазаға тарту. Халқымыз осы оқиғадан сабақ ала білуі керек. Елдің тыныштығын бұзып, қауіпсіздігіне нұқсан келтіретін әрекетке ешқашан жол бермеуге тиіспіз" - деді Қасым-Жомарт Тоқаев.

Еске сала кетейік, Қасым-Жомарт Тоқаев былтырғы Жолдауын 1 қыркүйекте жария еткен еді. "Халық бірлігі және жүйелі реформалар – ел өркендеуінің берік негізі" атты Жолдауы пандемиядан кейінгі кезеңдегі экономикалық даму, денсаулық сақтау жүйесінің тиімділігін арттыру, сапалы білім беру, өңірлік саясатты жетілдіру, еңбек нарығында тиімді экожүйе қалыптастыру, саяси жаңғыру және адам құқығын қорғау және басқа да бағыттарды қамтыды.

Бүгінгі ҚР Парламенті палаталарының бірлескен отырысына депутаттық корпуспен қатар, ҚР Премьер-Министрі Әлихан Смайылов бастаған Үкімет мүшелері, ҚР Мемлекеттік хатшысы Ерлан Қарин, Конституциялық Кеңес пен ҚР Жоғарғы сотының төрағалары мен мүшелері, ҚР Президентіне тікелей есеп беретін және бағынатын орган басшылары, ұлттық компаниялар мен мемлекеттік ұйымдар басшылары қатысып жатыр.

Талқылау