Қаржыгер басышысының жасанды интеллект жасаған бейнесіне сеніп, алаяқтарға 25 миллион долларын аударып жіберген
Гонконгта трансұлттық компанияның қаржыгері жасанды интеллект (AI) көмегімен жасалған әріптестерінің бейнесіне сеніп, қоңырауларға жауап беріп, алаяқтарға 25,5 миллион доллар аударған. Бұл туралы Stan.kz ақпарат агенттігі South China Morning Post басылымына сілтеме жасап хабарлайды.
Сурет BEN MARANS/SOPA IMAGES/SIPA USA/LEGION MEDIA
Оқиға қаңтар айының ортасында болды. Мұнда жасанды интеллект көмегімен компанияның бірнеше қызметкерлерінің фотосы мен бейнелері пайдаланылып, алаяқтар жалған бейне қоңырау шалған. Жағдайға байланысты гонконгтық қаржыгер Ұлыбританияда орналасқан қаржы директоры атынан онлайн кездесуге шақыру алған.
Кейін қоңырау кезінде басшылық қаржыгерден құпия транзакция жасауды сұраған. Жәбірленуші барлық қызметкердің сенімді сөйлегеніне қарап еш күмәнданбаған. Қаржыгер олардың барлығын таныған.
Нәтижесінде компания қызметкері Гонконгтағы бес банктік шотқа жалпы сомасы 25,5 миллион доллар 15 аударым жасаған. Ол өзінің алданғанын бір аптадан кейін компанияның штаб-пәтерінен білген.
Қаржыгер 29 қаңтарда полицияға арыз жазды. Құқық қорғау органдары тергеуді бастады. Олар алаяқтардың компанияның тағы екі-үш қызметкеріне осындай бейне қоңырауларға шақыру жібергенін анықтады. Алайда, әзірге күдіктілер жоқ.