"Бос сандырақ": Қазақстанның сыртқы істер министрі ресейлік депутаттың сөзіне қатысты пікір білдірді
ҚР сыртқы істер министрі Мұхтар Тілеуберді Ресей Федерациясы мемлекеттік думасының депутаты Федоровтың "Қазақстанмен біртұтас мемлекетті қалпына келтіруді" қолдайтынын айтқан жанжалды мәлімдемесіне қатысты пікір білдірді, деп хабарлайды Stan.kz ақпарат агенттігі.
Министр жеке адамдардың мәлімдемелері Ресейдің ресми ұстанымымен сәйкес келмейтіндігін баса айтты.
Ресей мемлекеттік думасының депутаты Вячеслав Никоновтың Қазақстанға "сыйға тартылған" аумақтары туралы сөйлеген сөзінен кейін Ресей Федерациясының уақытша сенімді өкілі Александр Комаров сыртқы істер министрлігіне шақырылды. Ресейлік дипломатқа Қазақстанның сыртқы істер министрлігінің позициясы көрсетілген нота келді.
"Қолданыстағы тәжірибеге сәйкес, олар ресми түрде жауап бермейді, бірақ қабылданған шаралар туралы хабарлады. Олар парламентпен және президент әкімшілігімен байланысып, осындай сөздерге қатысты сын айтты. Мен қазақпын, Қазақстанның азаматымын. Бұл менің қытығыма тиді. Отанымның тарихын білетін азамат ретінде айтылған нәрсені "бос сандырақ" деп айтқым келеді. Біріншіден, сіз тарихқа арқа сүйеуіңіз керек. Әрине, бұл Ресей Федерациясының ресми ұстанымына сәйкес келмейді", - деді министр.
Мұхтар Тілеуберді Қазақстан мен Ресей арасындағы заңнамалық деңгейде мемлекеттік шекара делимитацияланғанын, заңнамалық деңгейде екіжақты келісімге қол қойылғанын еске түсірді.
"Біз мемлекеттік шекараны белгілеп жатырмыз, пандемияға байланысты бұл процесс тоқтатылды", - деді сыртқы істер министрі.
Ол екі мемлекет арасында стратегиялық серіктестік қалыптасқанын атап өтті. Бұл барлық екіжақты құжаттарда айқын көрініс тапқан және Қазақстан Ресей Федерациясымен қатынастарды халықаралық құқық негізінде дамытады.