Биыл Алматыға келген 13 мыңға жуық студентке жатақхана орны жетпейді
Қазақстанда студенттер үшін жатақханаға орын беру мәселелері бойынша жедел желі ашылды. Ғылым және жоғары білім министрлігі орталық тәулік бойы жұмыс істейтінін мәлімдеді. Бұл туралы Stan.kz ақпарат агенттігі 31-арнаның Информбюро жаңалықтар бағдарламасына сілтеме жасап хабарлайды.
Енді қазақстандық студенттер жатақхана проблемаларын жедел желі арқылы хабарлай алады.
“Қазір пәтерлер қымбаттағандықтан, жатақхана тиімді. 40 мың теңгеден аспайды. Мысалы, старосталар үшін 40% жеңілдік бар. Мен өзім ауылданмын, егер маған орын берілмесе, қалай оқитынымды білмеймін”, – деді Kozybayev University студенті Айтолқын Шәкірова.
Ал мегаполистерде жағдай басқаша. Алматыда жатақханалардың жетіспеушілігі мәселесі әлі шешілген жоқ. Биыл қалаға келген 13 мыңға жуық студент баспанасыз қалуы мүмкін. Олар хостелдерге орналастырылады. Бұған көпшілігі қорқынышпен қарайды.
“Әрине, бұлай болатынын алдын ала болжадық. Өткен жылы орын тапшылығы проблемалары болды, биыл да болды. Хостелдерден қорықпау керек, бұл университеттікіндей жеке жатақханалар, бірақ бағалары сәл жоғары, сәйкесінше жағдайы жақсырақ”, – деді Алматы қаласы бойынша студенттік омбудсмен Әділхан Төлепберген.
Сарапшылар жатақханаға ақша бөлуді құптамайды. Айтуларынша, оның орнына ғылыми зертханаларды салу және жабдықтау немесе профессорларды оқыту, яғни білім сапасын арттыру жақсы болар еді.
“Алға қадам жасаймыз дейміз де, іс жүзінде екі қадам артқа шегінеміз. Өйткені білім сапасын арттыруға бағытталған ақшаның едәуір бөлігі білім беру мәселесіне қатысы жоқ материалдық-техникалық мәселелерді шешуге кетеді. Демографиялық жарылыс жалғаса береді, біз жыл сайын туу көрсеткіштерін жаңартып отырамыз. 15-20 жылдан кейін не болатынын елестетіп көріңіз?! Біреуді қамтамасыз ету керек деген ұранмен қашанғы жүреміз”, – деді білім беру саласындағы сарапшы Нүркен Халықберген.
Үкіметте бұл әлі талқыланбады. Қыркүйек айынан бастап 7000-нан астам жетім және ерекше қажеттілігі бар студенттер жатақханаларда тұру ақысына 100 мың теңге көлемінде материалдық көмек ала бастайды.