Атырау әкімінің орынбасарына қатысты тергеу жүріп жатыр – Ұлттық қауіпсіздік комитеті

Атырау қаласы әкімінің орынбасары Мейіржан Мұқасовтың ұсталғаны туралы ақпарат қоғамда қызу талқыланды. Ұлттық қауіпсіздік комитеті аталған дерекке қатысты сотқа дейінгі тергеп-тексеру жүргізіліп жатқанын растады. Бұл туралы Stan.kz ақпарат агенттігі Nur.kz порталына сілтеме жасап хабарлайды.

Маусым айының басында БАҚ-та Атырау қаласы әкімінің орынбасары Мейіржан Мұқасовтың ұсталғаны туралы ақпарат тараған еді. Бұл мәселеге қатысты Ұлттық қауіпсіздік комитеті пікір білдірді.

Мәліметтерге сенсек, істі ҰҚК департаментінің сыбайлас жемқорлыққа қарсы қызметі тергеп жатыр.

Қылмыстық іс материалдарында 40 миллион теңге көлеміндегі сома және тағы бір күдікті туралы деректер бар.

Сондай-ақ ұсталғаннан кейін Мейіржан Мұқасов процессуалдық келісім жасауға ниет білдіргенімен, кейіннен бұл шешімінен бас тартқаны айтылған.

Оқыңыз

Атырау әкімі жауап алудан кейін үйіне жіберілді – БАҚ Оқыңыз

ҰҚК өкілдері қазір сотқа дейінгі тергеп-тексеру жүргізіліп жатқанын мәлімдеді.

"Қылмыстық-процестік кодекстің 201-бабының 1-бөлігіне сәйкес, өзге ақпарат жарияланбайды", – деп хабарлады ведомство.

Ұлттық қауіпсіздік комитеті Атырау қаласы әкімінің орынбасарынан бөлек, "Тұрғын үйлерге қалалық коммуналдық қызмет көрсету" ЖШС бас директорының орынбасарына да қатысты сотқа дейінгі тергеу жүргізіліп жатқанын мәлімдеді. Кейін адвокат Нұрлан Жолболов қала әкімі мен оның орынбасары қылмыстық іс аясында жауап алынғанын мәлімдеді.

Айта кетейік, Мейіржан Мұқасов 2025 жылдың қаңтар айында Атырау әкімінің орынбасары қызметіне тағайындалған. Оған дейін облыс әкімінің кеңесшісі болып жұмыс істеген.

Еске салайық, бұған дейін Ақтөбеде Экономикалық тергеу департаментінің аға тергеушісі Ермек Махамбетов пен ведомствоның екінші жедел басқармасы басшысының орынбасары Даулет Саринге қатысты қылмыстық іс қаралған еді. Тергеу нұсқасы бойынша Махамбетов қаржы пирамидасына қатысты іс бойынша күдіктіден қылмыстық істі тоқтатуға уәде беріп, 50 миллион теңге талап еткен. Кейін күдікті құқық қорғау органдарына жүгініп, делдал ретінде пара алмақ болған Сарин ұсталған. Сот үкімімен Ермек Махамбетов 10 жылға, Даулет Сарин 2 жылға бас бостандығынан айырылып, екеуі де өмір бойына мемлекеттік қызметте жұмыс істеу құқығынан айырылды.