Атырауда 83 миллион теңгені жымқырды деп айыпталған аймақ басшысының орынбасары ақталды
Атырауда №2 қалалық соты бюджет қаражатын жымқырды деп айыпталған облыс әкімінің орынбасары Қайрат Нұрлыбаев пен "Бұйырғын" ӘКК төрағасының орынбасары Нұрлан Бисембаевты кінәсіз деп таныды, деп хабарлайды Stan.kz ақпарат агенттігі.
"Атырау қаласының №2 соты бұрын облыстық ауыл шаруашылығы басқармасының басшысы қызметін атқарған Атырау облысы әкімінің орынбасары Қайрат Нұрлыбаев пен "Бұйырғын" ӘКК төрағасының орынбасары Нұрлан Бисембаевқа қатысты бөтеннің мүлкін заңсыз иемдену фактісі қылмыстық істі қарады. Нұрлыбаев Бисембаевпен бірге ӘКК-ге инвестициялық субсидия түрінде берілген 83 700 649 теңгені жымқырды деп айыпталды.
Тергеу барысында агроөнеркәсіптік кешен субъектілерін субсидиялауға бөлінген қаражатты жымқыру бойынша сотталушылар арасында алдын ала сөз байласуының болуы туралы айғақтар келтірілмеген.
Сотта зерттелген дәлелдемелер ӘКК құжаттарын қабылдаған бөлім басшылары инвестициялық субсидиялар беру туралы өтінішке қоса берілген құжаттардың толықтығы үшін жауапты екені анықталды.
Сараптамалық ұйым мен жұмыс тобы объектінің өндірістік күшінің сәйкестігін тексеру актісін жасап, ол басшыға ұсынылды – оның негізінде субсидия беру туралы келісімге қол қойды.
Жауапкер Бисембаев ӘКК-де материалдық жауапты тұлға болып саналмайды, алғашқы үш субсидияны алу кезеңінде ӘКК-де жұмыс істемеген және құрылтайшы болмаған. 2020 жылғы 3 тамызда директордың орынбасары болып жұмысқа орналасқан.
Сот жауапкерлер инвестициялық қаражатты игермеген, бұл қаражатты ӘКК игерген деген қорытындыға келді.
ӘКК меншігіндегі құс фабрикасы жұмыс істеп тұр, салық уақытылы төленеді. Аудиторлық тексеру арқылы субсидия беру тәртібі анықталғаннан кейін берілген 83 700 649 теңге сомасында субсидия толығымен бюджетке қайтарылды, қазіргі уақытта ӘКК-нің азаматтық талап бойынша берешегі жоқ.
Жәбірленуші тараптың өкілі келтірілген залал толығымен өтелгенін айтты. Сот айыпталушылардың әрекеттерінде қылмыс құрамының болмауына байланысты оларды кінәсіз деп тапты", – деп хабарлады қалалық соттың баспасөз қызметі.
Сот үкімі заңды күшіне енген жоқ.